AILEU, 11 maiu 2023 (TATOLI) – Sekretáriu Jerál Partidu Frente Revolusionáriu Timor-Leste Independente (FRETILIN), Mari Alkatiri kompromete FRETILIN bainhira manan iha eleisaun tinan ne’e, lidera fila fali Governu mak sei hadia setór edukasaun iha Timor-Leste.
Nia observa, durante tinan 20 Timor-Leste ukun aan, maibé setór edukasaun seidauk la’o di’ak.
“Tanba ne’e FRETILIN kuandu manan hodi lidera fali mak ita sei hadia kualidade edukasaun liuliu iha parte kuríkulum ensinu sai kualidade hodi forma ita-nia ema sai kualidade”, Sekretáriu Jerál FRETILIN, Mari Alkatiri, dehan perante komísiu partidu FRETILIN nian ne’ebé halao iha kampu futeball Sabaraka-Laran, Aileu Vila, kinta ne’e.
“Dala ruma ita-nia kuríkulum ne’ebé hanorin iha eskola sira, hanorin mós lian materna, ita konstituisaun RDTL ne’e portugés mak lian ofisiál, tanba ne’e, kuandu FRETILIN manán, ita sei hadia kualidade kuríkulum ensinu, hodi dezenvolve setór edukasaun ho di’ak”, Mari Alkatiri promete.
Sekretáriu Jerál FRETILIN adianta, kuandu hadia kuríkulum ensinu sei forma rekursu umanu ho kualidade.
“Kuandu rekursu umanu mak kualiadade mak nasaun mós dezenvolve ho di’ak liután, tanba edukasaun mak forma ema ho kualidade no edukasaun prodús ema ho kualidade, tanba ne’e, FRETILIN fila fali ba ukun sei foku hodi hadia setór edukasaun”, nia dehan.
Iha biban ne’e, lider nasionál ne’e promete, kuandu FRETILIN mak lidera Governu IX sei tau mós atensau ba profesór sira.
Jornalista: Natalino Costa
Editór : Zezito Silva
