iklan

HEADLINE, SEGURANSA

Natercia Eufrasia husu apoia Autoridade lokál kontrola joven bairu laran

Natercia Eufrasia husu apoia Autoridade lokál kontrola joven bairu laran

Komandante PNTL munisípiu Dili, Superintendente Xefe Polísia Natercia Eufrasia Soares Martins. Imajen Tatoli/Francisco Sony

DILI, 11 maiu 2023 (TATOLI)–Komandante Polísia Nasionál Timor-Leste (PNTL) munisípiu Dili, Superintendente Xefe Polísia Natercia Eufrasia Soares Martins, husu ba Autoridade lokál atu apoia Polísia kontrola joven sira iha bairru laran nune’e evita konfrontu entre joven sira.

Apelu ne’e iha ámbitu diálogu ho Autoridade lokál iha postu administrativu Vera Cruz, munisípiu Dili inklui Brigada sira iha edifísiu administrasaun Vera Cruz.

“Administradór postu administrativu Vera Cruz konvida ha’u hodi mai fahe informasaun oitoan ligadu ho Polísia nia serbisu, liu-liu seguransa iha tempu agora. Iha hasoru malu entre ha’u ho Autoridade lokál sira ne’e hodi fahe informasaun liga ba oinsá entre autoridade no Polísia bele fó apoia malu asegura seguransa, nune’e autoridade bele fó hanoin ba komunidade liu-liu individuu joven sira hodi asegura situasaun durante períodu kampaña eleitorál to’o eleisaun,” Natercia Martins, hateten, kinta ne’e.

Notísia relevante : Joven-sira iha papél importante kontribui ba hametin dame iha sosiedade

Komandante Dili nota, individuu joven sira agora gosta liu gasta tempu halo konflitu do que dezenvolve-an liuhosi atividade di’ak ruma.

“Liuhosi Autoridade lokál sira bele fó hanoin ba sira-nia populasaun tanba dala-barak konflitu mosu sempre iha ninia konsikuénsia no ema inosente maka sempre simu konsikuénsia ne’e,” nia akresenta.

Nia dehan, ba oin bainhira kaer joven sira ne’ebé envolve iha konflitu, sei bolu sira-nia inan no aman hodi husu justifikasaun maneira eduka oan loron-loron iha sosiedade, ne’ebé bainhira Autoridade seguransa bolu inan-aman sira sei husu kooperasaun hosi líder komunitáriu atu serbisu hamutuk nune’e buka solusaun ba problema sira ne’ebé akontese hodi labele kontinua akontese.

Biban hanesan, Administradór postu Vera Cruz, Manuel Gusmão, agradese ba Komandante PNTL Dili tanba bele marka prezensa iha diálogu hodi hasoru malu ho líder komunitáriu no brigada sira.

“Ha’u konvida Komandante Dili tanba daudaun ita iha faze pre-eleitorál, ida-ne’e sidade Dili sempre mosu konflitu, liu-liu iha kampaña no mosu dezintendimentu balun iha eleisaun nian, ne’ebé atu prevene dezintendimentu sira maka ha’u konvida Komandu Dili hodi hato’o mensajen ruma ba líder komunitáriu hodi prevene situasaun sira ita la espera, liu-liu iha área Vera cruz,” nia tenik.

Diálogu ne’e mai hosi Administradór postu no Xefe suku sira iha postu administrativu refere Vera Cruz, kompostu hosi suku Caicoli, Colmera, Motael, Maskarinhas, Lahane Osidentál, Vila verde, no Dare.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!