iklan

DESPORTU, DILI, HEADLINE

Joven-sira iha papél importante kontribui ba hametin dame iha sosiedade

Joven-sira iha papél importante kontribui ba hametin dame iha sosiedade

Prezidente Repúblika, José Ramos-Horta, hala’o diálogu ho Grupu Artes Marsiais no Artes Rituais,iha Palásiu Prezidente Nicolau Lobato, Bairru Pite, Dili, segunda, (03/10). Imajen Tatoli /Egas Cristovão

DILI, 03 outubru 2022 (TATOLI)– Prezidente Repúblika, José Ramos Horta, hateten joven-sira ne’ebé envolve Grupu Arte Marsiál (GAM) no Grupu Arte Rituál (GAR), nia papél importante tebes atu kontribui hametin dame iha sosiedade Timor-Leste.

Xefe Estadu hato’o asuntu ne’e bainhira hala’o sorumutu ho Sekretáriu Estadu Juventude no Desportu (SEJD), Abrão Saldanha no Líder GAM no GAR, atu hametin dame hodi hakribiit konflitu iha sosiedade Timor-Leste.

Iha sorumutu ne’e, PR Horta husu ba parte hotu labele jeneraliza GAM no GAR hanesan kriminozu, maibé tenke buka difine no hatene uluk problema ne’ebé akontese nia huun loloos.

“Ita labele jeneraliza arte marsiál, buiat hotu dehan sira mak halo, ezemplu de’it kuandu membru Polisia Nasionál Timor – Leste ruma mak halo problema ita labele hatete PNTL mak halo problema, maibé individu mak halo hanesan mós arte marsiál individu mak halo la’ós ema hotu mak halo konflitu,” dehan PR Horta, iha resintu Palasiu Prezidensiál, Bairru Pité-Dili, segunda ne’e.

Prezidente Repúblika mós rekoñese dalaruma líder hosi GAM no GAR sira difisil atu kontrola membru sira tanba lÍdera joven rihun ba rihun.

“Maibé, ita buka ko’alia halo didi’ak organiza atu joven sira ne’e bele hetan fatin ida iha sosiedede atu kontribui ba hametin dame iha sosiedede nia le’et,” katak PR Horta.

Atu evita konflitu, Xefe Estadu afirma iha ona planu atu kria Peace Corps Timor -Leste nian hanesan mós grupu ne’ebé kria hosi Estadu Unidu Amerika (EUA) hodi joven-sira  hakbesik ba komunidade sira halo servisu oi-oin iha área agrikultura no seluk tan.

“Ba oin ita iha ona planu atu kria Peace Corps hanesan grupu Amerikanu sira nian, sira mai iha Timor – Leste ha’u mak lori sira mai, kria grupu hanesan ne’e envolve joven sira hodi hakbesik ba komunidade sira hodi hala’o atividade hanesan  hamoos lixu, ajuda komunidade halo produsaun ba agrikola, halo barajen kiikoan sira ba natar no seluk tan atu hamenus konflitu,” katak.

Iha biban hanesan, Sekretariu Estadu Juventude no Desportu (SEJD), Abrão Saldanha, informa sira nia parte prepara ona lei foun ba GAM no GAR hodi hatama iha sub-sistema hamutuk tolu iha laran nune’e regula organizasaun arte marsial sira ho di’ak liu tan.

“Lei foun ne’ebé prepara hela mak atu hatama sub-sistema rua ka tolu iha laran, sub-sistema sira ne’e mak hanesan enkuadra sira iha Sistema Nasionál Desportu, daudaun ami hanoin hela atu kria kompetisaun kampionatu ba GAM sira,” dehan nia.

Segundu mak sub-sistema kotra ordenasaun tanba lei rejime jerál ba kontra ordenasaun seidauk iha, nune’e SEJD kria atu haree membru GAM ida mak sala sentru ka fatin ida hala’o treinamentu ba ne’e tenke responsabiliza no ikus liu mak sub-sistema rejistu.

“Ikus ne’e ko’alia kona-ba rejistu, organizasaun harí, maibé rejistu ho kritéria oi-oin hodi difine objetivu klaru ho treinamentu ne’ebé klaru mak ita bele autoriza hala’o atividade organizasaun nian, nune’e sira bele halo treinamentu sira públikamente,” katak nia.

Tanba ne’e, SEJD servisu maka’as hela hamutuk ho ekipa liña ministeriál hanesan, Polisia Nasionál Timor – Leste (PNTL), FALINTIL-Forsa Defeza Timor – Leste (F-FDTL), Ministériu Edukasaun Juventude no Desportu (MEJD) no Ministériu Justisa (MJ) hodi prepara lei foun ne’e.

Lejizlasaun ne’e, nia dehan sei aprezenta ba Parlamentu Nasionál hodi halo diskusaun iha tinan ne’e no sei haruka ba Prezidente Repúblika atu haree no halo promulga, nune’e bele implementa hodibele enkuadra di’ak liután maluk arte marsiál no ritual sira.

Entretantu, Sekretáriu Jerál Organizasaun Persaudaraan Seti Hati Terate (PSHT), Pedro Aparicio, hateten problema GAM hanesan konflitu ne’ebé komplikadu.

“Problema arte marsiál iha Timor – Leste ne’e kuaze laiha, problema iha Timor ne’e so problema sosiál, konflitu mosu fasil ema jeneraliza tanba dehan ida ne’e IKS, ida ne’e PSHT ida ne’e KORK ne’e mak jeneraliza tia sasan maibé problema partikular la’ós arte marsiál,” dehan Pedro.

Nia fó ezemplu bainhira problema mosu ema sempre tau todan ba arte marsiál, maibé nunka buka tuir problema tanba saida no nia ne’e sé, maibé GAM prontu simu todan hotu ne’ebé ema seluk tula ba sira tanba sira mós partense ba juventude Timor-Leste.

“Ita nia rai ne’e kampo servisu laiha ne’e mak joven sira sempre halo problema ne’e, ezemplu ida tan joven sira hosi PSHT, KORK, IKS no 77 iha Austrália sira sa’e karreta hamutuk hatudu sira nia unidade ba malu, signifika sira iha ona servisu sira sei la hanoin atu halo konflitu ba malu, ita nia rain presiza kampu traballu ne’e, mak foin hamenus problema tanba ema hotu preokupadu ba servisu no la hanoin konflitu,” nia relata.

Prezidente IKS Timor-Leste, Silvestre Sufa, deklara konflitu ne’ebé dalabarak akontese iha sosiedade, la’ós komete hosi GAM, maibé problema partikular no ema seluk sempre dun ba GAM, maibé lakohi buka hatene loloos motivu hosi problema ne’ebé akontese.

“Dalabarak problema kona-ba rai, problema iha festa kona-ba dansa, problema oi-oin la’ós organizadu tula hotu mai ami GAM, maibé ida ne’e labele akontese presiza halo sosializasaun tun ba too baze no ba ema hotu atu konflitu mosu haree halo didiak lai foin julga,” nia dehan.

Jornalista: Hortencio Sanchez

Editór        : Florencio Miranda Ximenes

iklan
iklan

Leave a Reply

iklan
error: Content is protected !!