DILI, 11 maiu 2023 (TATOLI)—Primeiru-Ministru (PM), Taur Matan Ruak, admite kriasaun moeda própriu ba país ida la’ós prosesu fásil, maski sai ona diskusaun iha membru Asosiasaun Nasaun Sudeste Aziátiku (ASEAN, sigla inglés).
“Iha moeda rasik ne’e hanesan intensaun ne’ebé foin lansa, ne’e la’ós prosesu fásil iha tempu badak maibé naturalmente ne’e nasaun hotu-hotu ko’alia ona. Timor mós hanesan desde ha’u-nia tempu nu’udar Prezidente Repúblika, ko’alia atu posibilidade ita iha moeda rasik, ne’ebé ita iha ona moeda besi maibé iha oin ita tenke haree, ida-ne’e lori tempu naruk ida,” PM Taur hateten iha Aeroportu Internasionál Prezidente Nicolau Lobato, Comoro, kinta ne’e.
Notísia relevante : Prezidente Indonézia komprometidu apoia Timor-Leste halo kapasitasaun institusionál ba ASEAN
Kestaun ne’e Xefe Governu hato’o hafoin akompaña hosi Ministra Negósiu Estranjeiru no Kooperasaun, Adaljiza Albertina Xavier Reis Magno, inklui delegasaun partisipa iha simeira ASEAN, iha Labuan-Bajo, Nusa Tenggara Timur, Indonézia, iha loron 09 maiu.
Biban hanesan, Ministra Negósiu Estranjeiru no Kooperasaun, Adaljiza Albertina Xavier Reis Magno, informa, durante diskusaun iha simeira ASEAN la foka kona-ba asuntu moeda.
“Atu iha rasik moeda ka lae ne’e desizaun soberanu país ida nian, país seluk la interven ba desizaun soberanu ba kondisaun fiskál rai ida-idam nian. Cambódia ne’ebé nu’udar membru ASEAN mós uza dolar to’o agora, laiha problema. Entaun ida-ne’e desizaun soberanu depois ami iha simeira foin daudaun laiha diskusaun kona-ba moeda, ne’ebé Timor-Leste uza dolar to’o sai membru plenu ASEAN, tanba ne’e desizaun soberanu ne’ebé la’ós kestaun para membru ASEAN kestiona,” nia dehan.
Jornalista : Antónia Gusmão
Editora : Julia Chatarina
