DILI, 11 maiu 2023 (TATOLI) – Prezidente Partidu Congresso Nasional de Rekonstrusão Timor-Leste (CNRT), Kay Rala Xanana Gusmão, no estrutura partidu nia louva militante no simpatizante sira, tamba hatudu ona hahalok ezemplár hodi la monu ba provokasaun adversáriu sira ne’ebé hakarak distúrbiu orden públika.
“Ita-nia Prezidente Kay Rala Xanana Gusmão ho estrutura CNRT louva hahalok ezemplár ne’ebé hatudu ona hosi militante, simpatizante no movimentu sira hotu durante hala’o kampaña CNRT nian iha fatin ne’ebé de’it”, haktuir Roberto Soares, iha Bairro dos Grilhos, kinta ne’e.
Nia dehan prezidente ho estrutura partidu CNRT konsidera militante no apoiante sira iha duni maturidade polítika, tanba la responde buat ruma hasoru provokasaun sira ne’ebé lansa hosi adversáriu partidu sira seluk atu tenta hamosu distúrbiu.
“Tanba ne’e partidu CNRT ho konviksaun tomak konsidera katak povu Timor-Leste konsiente ona kona-ba votu sagradu ne’ebé sira iha atu deside ba futuru ida ne’ebé nabilan ba povu no ba nasaun ida ne’e. Nune’e, povu hatene de’it katak ho maun boot Kay Rala Xanana Gusmão de’it maka iha determinasaun atu transforma povu nia mehi atu sai realidade, liuhosi Planu Estratéjiku Dezenvolvimentu Nasionál 2011-2030”, katak.
Prezidente Partidu CNRT agradese militante no simpatizante hotu ne’ebé fó ona apoiu ba CNRT hodi demonstra sira-nia partisipasaun iha kampaña partidu nian ne’ebé hala’o ona hodi afirma votu konfiansa ba Xanana Gusmão atu kaer fali ukun iha 2023-2028.
Xanana husu ba ninia militante sira bainhira konfiansa ida ne’e atu sai duni realidade maka tenke serbisu makas hodi la’o iha dalan ida de’it hodi vota ba númeru 12, tanba ho rezultadu ida ne’e de’it maka mehi ne’ebé iha sei sai realidade atu hamutuk lori nasaun ba futuru ida nabilan.
Notísia relevante: CNRT rejista militante na’in-13 sai vítima durante kampaña
Jornalista: Tomé Amado
Editora: Maria Auxiliadora
