MALIANA, 12 Maiu 2023 (TATOLI)-Estrutura Partidu Kmanek Haburas Unidade Nasionál Timor Oan (KHUNTO), Munisípiu Bobonaro, hato’o keisa ba Polísia Nasionál Timor-Leste (PNTL) munisípiu Bobonaro, ligadu ho deklarasaun sidadaun Indonézia na’in-rua ne’ebé asesu kartaun eleitorál.
Sekretáriu Jerál partidu KHUNTO Munisípiu Bobonaro, Fernando Raul, esklarese prezensa iha komandu polísia munisípiu tanba sidadaun na’in-rua ho naran Amelia Perreira no Agusta Pinto, deklara informasaun ne’e ba publiku liuhosi komísiu partidu CNRT iha área lokalidade munísipiu Bobonaro nian.
“Ami mai keisa iha komandu polísia munisípiu Bobonaro, atu buka-tuir inan na’in-rua ne’e ninia paradeiru hodi nune’e bele halo investigasaun kle’an, kona-bá karatun eleitorál ne’e sé mak fasilita, hosi suku ne’ebé no aldeia ne’ebé, tanba ami nein koñese ema ne’e, ami iha baze de dadus ne’ebé kompletu militante no simpatizante, estrutura nível munisípiu to’o aldeia, maibé ema ne’e la rejistradu iha ami-nia baze dadus partidu KHUNTO munisípiu Bobonaro,” Nlnia informa ba jornalista sira, iha Komandu Polísia Munisípiu Bobonaro, sesta ne’e.
Fernando Raul husu ba Partidu CNRT atu aprezenta sidadaun na’in-rua ne’e ninia laradeiru atuál nune’e autoridade seguransa bele loke prosesu investigasaun.
“Partidu CNRT hanesan ami-nia mestre, ami-nia aman, favór boot ida ami hanoin atu hafasil PNTL bele kolabora ho partidu CNRT munísipiu Bobonaro, tanba sira mak hatene kle’an liu kona-bá sira-nia hela fatin, aldeia no suku, tanba sira mak fasilita sidadaun na’in-rua ne’e sa’e ba lalku Leten iha kampaña halo iha kampu futeból Maliana,” nia husu.
Diretór Sekretariadu Tékniku Administrasaun Eleitorál (STAE) Munisípiu Bobonaro, Mariano Viegas Amarál, hateten STAE prontu kolabora ho instituisaun relevante atu identifika sidadaun na’in-rua ne’e mai hosi munisípiu ne’ebé.
Nia hatutan, provizóriu seidauk bele halo verifikasaun iha sistema, tanba prosesu investigasaun sei la’o hela.
“Ami mós sei husu apoiu hosi ita-nia parte seguransa rumoris ida
-ne’ebé mak sidadaun sira tuir komísiu partidu balun ninian, sira dehan hosi mota-sorin, maibé so ami haree di’diak iha ami-nia sistema, ami koñese kle’an sira-nia naran saida. Ami koñese sira-nia data moris, inan aman depois ami check iha sistema, nia rejistu iha-ne’ebé, postu ne’ebé, munisípiu ne’ebé ita bele deteta,” nia dehan.
Diretór Mariano hateten, sidadaun Indonézia hetan kartaun eleitorál inklui ema-ne’ebé fasilita ne’e konsidera krime tanba ema sidadaun Timoroan mak iha direitu atu hetan kartaun ne’e.
“sidadaun ne’e rasik inklui ami-nia ofisiál se mak hatene katak ema ne’e laiha direitu maibé fasilita nia, tenke prontu simu konsekuénsia iha kódigu penál artigu 229 ne’e hateten klaru katak, sidadaun ne’ebé STAE mós labele impede, depois sé mak fasilita ida-ne’e mós krime ida,” Mariano subliña.
Notísia relevante: CNRT-KHUNTO husu investiga sidadaun Indonézia ne’ebé asesu kartaun eleitorál iha Bobonaro
Jornalista: Sérgio da Cruz
Editór: Evaristo Soares Martins
