MALIANA, 12 maiu 2023 (TATOLI)— Partidu Congresso Nacional de Reconstrução de Timor (CNRT) no Kmanek Hburas Unidade Nacional Timor Oan (KHUNTO) husu autoridade seguransa loke investigasaun ba kazu sidadaun Indonézia na’in-rua ne’ebé asesu kartaun eleitorál iha munisípiu Bobonaro.
Iha komísiu Partidu CNRT nian ne’ebé hala’o iha kampu Futeból Maliana, Munisípiu Bobonaro, Amelia Pereira, iha palku leten deklara to’o tempu eleisaun hakat hosi Indonézia mai vota iha Timor-Leste.
Notísia Relevante: KHUNTO promete investe iha setór seguransa hodi kombate droga ilísita
“Ami hela iha Indonézia, momentu ne, ami tama mai haree família iha Timor-Leste, como ami laiha kartaun eleitorál ne’ebé sira tawar mai ami atu halo fodik kartaun eleitorál, to’o tempu vota ami mai vita ba sira-nia partidu KHUNTO, maibé ohin loron iha dalan ona mai ami atu vota ba CNRT, tanba durante ne’e ami la hatene partidu ami hanya hakarak mai hare família iha Timor-Leste,” nia hateten iha kampu futeból Maliana, kinta ne’e.
Amelia fó-sai katak, sidadaun balun sei iha hela Atambua, Indonézia.
“Ami barak los mak hetan kartaun eleitorál balun la mai, ohin ami na’in-rua mak mai, ami kuaze ema 20-resin,” nia dehan.
Relasiona ho kestaun ne’e, Prezidente Partidu CNRT, Kayrala Xanana Gusmão, husu instituisaun relevante, liuliu Komisaun Nasionál Eleisaun (CNE, sigla portugés) atu loke prosesu investigasaun.
“Ida-ne’e hatudu de’it ilegalidade, KHUNTO entrega kartaun eleitorál ba ema Indonézia, ne’e kontra estadu no kontra lei, sira mai iha-ne’e dehan KHUNTO nia ema ba to’o iha ne’ebá entrega kartaun eleitorál ba ami atu vota, ne’e iha Atambua lahatene, keta iha fatin seluk tán, ida-ne’e mak bolu atensaun ba CNE, lae ita arbiru de’it ona,” Xanana dehan.
Notísia relevante: KHUNTO hakarak harii unidade entre joven sira
Hatán ba kestaun ne’e, Konsellu Jurizdisaun hosi partidu Kmanek Haburas Unidade Nacional Timor Oan KHUNTO, husu ba órgaun kompetente estadu nian atu kaptura sidadaun na’in-rua ne’ebé aprezenta dokumentu kona-bá falsifikasaun pasaporte no kartaun eleitorál ne’e.
“Husu ba órgaun kompetente hanesan polísia, migrasaun, serbisu intelijénsia, PCIC ho instituisaun relevante sira seluk atu imediatamente kaptura sidadaun na’in-rua ne’ebé mak partisipa komísiu CNRT nian iha Maliana ho objetivu atu deskobre verdade, se loos mak halo falsifikasaun dokumentu, sera ke KHUNTO mak halo ka partidu CNRT rasik, nia informa liuhosi konferénsia imprensa iha Manleuana, Dili, sesta ne’e.
Nia hateten, partidu KHUNTO laiha kompeténsia atu prodús dokumentu Estadu ninian hanesan kartaun eleitorál ho pasaporte.
“Ida-ne’e kabe ba kompeténsia STAE no Ministériu Justisa, tanba ne’e ami reprezenta partidu husu ba órgaun kompetente sira atu asegura sidadaun na’in-rua ne’ebé mak partisipa komísiu CNRT iha Maliana no husu mós Ministériu Públiku atu toma atensaun sériu ba asuntu ne’e,” nia hateten.
Nia mós husu ba partidu CNRT ho nia estrutura iha munisípiu Bobonaro atu aprezenta prova kona-bá falsifikasaun dokumentu ba iha Ministériu Públiku no partidu KHUNTO prontu atu ba responde iha Tribunál.
Jornalista Sérgio da Cruz/Nelson de Sousa
Editór: Evaristo Soares Martins
