AINARO, 12 Maiu 2023 (TATOLI) – Prezidente Partidu Demokrátiku (PD), Mariano Asanami Sabino, promete bainhira kaer ukun, sei aloka fundu no fornese ekipamentu ba suku sira hodi reforsa dezenvolvimentu iha baze.
“Motto PD-nian mak harii nasaun husi baze. Nasaun forte bainhira suku ho aldeia forte. Ita sei tau fundu $ 200.000 to’o $400.000 ba kada suku hodi nune’e dezenvolvimentu iha área rurál bele la’o. Dezenvolvimentu nível suku importante, tanba sira mak forsa no aliserse ba Estadu”, Mariano Assanami Sabino kompromete, iha kampaña eleitorál ne’ebé realiza, iha kampu futeból Ainaro Vila, sesta ne’e.
Tuir nia, vizaun partidu-nian ba oin mak hakarak transforma suku sai sidade ba área potensiál hanesan sidade hare, sidade kafé, sidade batar, sidade peska no sidade oi-oin.
“Iha planu urbanu ita sei define mapeamentu oinsá ita hamutuk dezenvolve sidade ne’ebe integradu hodi hametin liu tan koezaun sosál no konketividade entre ita”, nia realsa.
Mariano Assanami Sabino kompromete bainhira PD kaer ukun sei estabelese sentru saúde, eskola no fatin ba labarik sira no kampu futebol iha kada suku.
PD mós sei kria kondisaun ba pesoál médiku, liuhusi harii rezidénsia, hadia sentru saúde, garante disponibilidade aimoruk no iha konsulta médiku regulár ba populasaun, atu nune’e Timor-Leste bele hetan jerasaun ne’ebe saudável no matenek.
Partidu ne’e mos sei defende nafatin polítika fahe tratór ba agrikultór sira no subsídiu kombustível gratuitu ba fila rai hodi moderniza setór agríkola no sei estabelese no reforsa grupu kooperativa hodi sosa produtu lokál.
Mariano Sabino dehan, planu prioridade PD-nian ida mak hakarak hakotu má nutisaun iha Timor-Leste, tanba ne’e investe iha setór peska atu nune’e bele garante 60% stock ai-han mai husi tasi.
PD Promete bainhira kaer ukun sei hatur fali meza Parlamentu Nasionál hodi sai fatin sagradu ne’ebe halibur ideia hodi deskute no aprova lei no programa ne’ebe fó benefisiu ba povu.
Notísia relevante: PD hakarak promove Turizmu Ekolójiku iha Ataúru
Jornalista: Afonso do Rosário
Editora: Isaura Lemos de Deus
