VIQUEQUE, 13 maiu 2023 (TATOLI)—Ekipa Sekretariadu Tékniku Administrasaun Eleitorál (STAE) nasionál distribui ona materiál sensitivu no naun sensitivu hamutuk kaixa 12 Eleisaun Parlamentár 2023 ba Administrasaun muninisípiu Viqueque.
“Aban (domingu) ami sei distribui karta konvite ba partidu polítiku no observadór sira. Misa sai, ami hahú halo pakotementu hodi haree filafali buletin sira-ne’e,” Diretór STAE Viqueque, Humberto Fernandes, hateten iha salaun Administrasaun munisipál, sabádu ne’e.
Notísia relevante : STAE prepara viatura kuaze 600 tula materiál eleisaun ba munisípiu
Nia dehan, prosesu distribuisaun hetan akompañamentu másimu hosi Polísia Nasionál Timor Leste (PNTL).
“Ami kontinua halo koordenasaun ho Komandante PNTL Viqueque hodi asegura materiál sira ne’e tanba durante semana ida rai iha STAE Viqueque,” nia akresenta.
Materiál sira kompostu hosi livru 3.309 ho folla hamutuk 65.450 iha kaixa 12 nia laran.
Tuir dadus, eleitór munisípiu Viqueque hamutuk na’in-58.566.
Ekipa lori materiál sira sai hosi Dili iha sesta (12/05) maizumenus tuku 12:00 meiu dia no to’o Viqueque tuku 18:40 lorokraik, ne’ebé akompaña hosi Diretór STAE Viqueque, CNE Viqueque, Administratór postu Viqueque Villa, Ossu, Lacluta, Uatulari, Uatucarbau, no hetan akompañamentu hosi PNTL Viqueque.
Jornalista : Vitorino Lopes da Costa
Editora : Julia Chatarina
