COVALIMA, 15 maiu 2023 (TATOLI)—Sekretáriu Administradór Munisípiu Covalima, Francisco de Jesus Alves, hateten autoridade Covalima hatun ona orientasaun ba administradór postu administrativu atu husu komunidade dada-sa’e bandeira RDTL iha uma oin, iha ámbitu Komemorasaun Loron Restaurasaun Independénsia Timor-Leste (20 maiu 2002-20 maiu 2023).
Notísia Relevante: MAE relata preparativu komemorasaun loron restaurasaun 20 maiu ba PR
“Ha’u fó orientasaun iha semana hirak liu-ba liuhosi pajina ofisiál Administrasaun Munisípiu Covalima no verbalmente ita orienta-ona, ba ita-nia administradór postu administrativu sira atu orienta komunidade dada-sa’e bandeira RDTL iha ida-idak nia uma oin,” Francisco de Jesus Alves hato’o ba Agência Tatoli, iha nia servisu fatin Sukaer Laran, segunda ne’e.
Bazeia ba orientasaun ne’ebé hatun ba administradór hotu hodi husu komunidade sira atu dada sa’e bandeira RDTL, tanba iha orientasaun ne’e klaru no bandu komunidade dada-sa’e bandeira RDTL hamutuk ho bandeira partidu polítiku.
“Autoridade Covalima hatun orientasaun klaru bandu komunidade dada-sa’e ita-nia bandeira nasionál hamutuk ho bandeira partidu nian maibé komunidade dada-sa’e bandeira partidu ho bandeira RDTL labele tau hamutuk maibé nia riin tenke ketak-ketak,” nia dehan,
Aleinde ne’e fó orientasaun ba administradór postu administrativu sira-nia mós fó orientasaun ba Ofisiál Polísia Suku (OPS) no xefe suku sira atu kontrola komunidade dada-sa’e bandeira RDTL hamutuk no bandeira partidu tenke informa ba komunidade sira atu labele dada-sa’e bandeira RDTL hamutuk ho bandeira partidu.
Covalima laiha atividade animasaun komemora 20 maiu
Aleinde ne’e, nia hateten komemorasaun loron restaurasaun independénsia Timor-Leste (20 maiu 2002-20 maiu 2023) laiha atividade animasaun, tanba okupadu halo preparasaun ba eleisaun parlamentár.
“Kona-ba komemorasaun loron Restaurasaun Independénsia Timor-Leste (20 maiu 2002-20 maiu 2023), tanba hasoru loos eleisaun jerál, entaun iha ona orientasaun hosi Ministru Administrasaun Estatál (MAE), ita sei hala’o de’it serimónia isár bandeira nasionál iha resintu Administrasaun Munisípiu Covalima. Ita lahalo atividade animasaun tanba okupadu halo preparasaun eleisaun parlamentár,” nia dehan.
Serimónia isár bandeira Repúblika Demokrátika Timor-Leste (RDTL) 20 maiu 2023 sei partisipa hosi Ministru Administrasaun Estatál (MAE), Miguel Pereira de Carvalho.
Durante realiza serimónia isár badeira, Ministru Administrasaun Estatál (MAE), Miguel Pereira de Carvalho, administradór munisípiu Covalima, Francisco de Andrade, Diretór CNE, STAE no komandante PNTL munisípiu Covalima sei hato’o sira-nia diskursu.
Hafoin finaliza serimónia isár badeira kontinua hala’o kedas serimónia distribuisaun Materiál sensitivu no la’os sensitivu ba sentru votasaun no estasaun votasaun ne’ebé estabelese ona iha munisípiu Covalima.
Tuir dadus hosi Sekretáriu Tékniku Administrasaun Eleitorál ne’ebé Agência Tatoli asesu, preparasaun eleisaun parlamentár ne’e, STAE estabelese sentru votasaun 100 no estasaun votasaun 120 iha munisípiu Covalima.
Jornalista : Celestina Teles
Editór : Cancio Ximenes
