OÉ-CUSSE 15 maiu 2023 (TATOLI) –Autoridade Rejiaun Administrativa Espesiál Oé-Cusse Oé-Cusse Ambeno (RAEOA), segunda ne’e selebra kontratu ho aosiasaun ualu (8) liuhosi programa subvensaun públika ho valór $240,322 hodi apoia serbisu autoridade kona-bá papél sosiedade sivíl nian atu tau matan ba problema sosiál sira-ne’ebé akontese iha Oé-Cusse Ambeno.
Programa ne’e nu’udar siklu dahuluk, hafoin grupu asosiasaun ualu ne’e submete proposta ba Gabinete Prezidente Autoridade RAEOA liuhosi prosesu avaliasaun hetan rezultadu di’ak, bele apoia serbisu autoridade nian ba asuntu feto, ema ho defisiénsia inklui violénsia doméstika no kazu seluk tán
Notísia relevante: Governu sei apoia Uma Pás-PRADET mellora atendimentu violénsia ba jéneru iha RAEOA
Prezidente Autoridade RAEOA, Arsénio Paixào Bano, informa, selebrasaun ne’e ba siklu dahuluk, totál fundu orsamentu apoia ba asosiasaun ualu ne’e hamutuk $240,322.00, no sei iha oportunidade ba siklu daruak, sei liuhosi avaliasaun proposta, bazea prioridade, planu asaun anuál no programa planu estratéjiku RAEOA nian.
Nune’e, nia agradese ho selebrasaun ne’e bele tulun RAEOA hamutuk esforsa hodi atendimentu dignu ba problema sosiál sira ne’ebé akontese iha Oé-Cusse Ambeno.
“Asosiasaun ualu ne’e barak nia serbisu ba tarjetu feto sira, administrasaun sosiál, parseria ema ho defisiénsia no vítima violénsia doméstika, ne’e ami kontente tebes, tanba iha Oé-Cusse organizasaun sira hosi nasionál, hala’o ona serbisu barak iha asuntu feto, inklui apoia legál, hanesan JSMP, ALFELA, ho sira-nia apoiu, servisu sei la’o forte di’akliu-tán,” Arsénio Paixão Bano, ko’alia iha ámbitu selebrasaun.
Nune’e mós ba PRADET Timor-Leste, no Uma mahon, tanba sai ona parsériu ho RAEOA, nune’e autoridade kontinua apoia ba kazu violénsia doméstika, la’ós haree ba kazu sira-de’it, maibé autoridade mós tau matan ba empoderamentu ekonomia ba família sira hanesan AFMEF, ne’ebé durante tulun ona organizasaun feto barak, hodi dezenvolve inisiativa feto nian ba aumenta rendimentu ekonomia família.
Arsénio Paixào Bano, apela ba asosisaun ualu ne’ebé hetan ona apoia hosi Autoridade, kontinua servisu di’ak ba ita-nia komunidade, ba vítima sira, no mós haforsa atividade feto sira, Autoridade prontu atu kontinua halo kooperasaun ba interese komun ba interese populasaun RAEOA nian.
Direitora Uma Pás Oé-Cusse, Lourdes de Almeida, reprezenta asosiasaun ualu, agradese ba autoridade no promete atu kolabora ho autoridade RAEOA ba apoia fundu ne’ebé iha, no fiar katak iha futuru sei hamutuk ho parseriu sira seluk hodi haforsa implementa serbisu iha Oé-Cusse Ambeno.
“Ami apresia ho inisiativa sira-ne’ebé kapas tebes, ami haree katak ida-ne’e pasu pozitivu, ba oin oinsá Autoridade bele haree asuntu sosiedade sivíl atu kontinua fó apoia, tanba sosiedade sivíl hanesan parsériu dezenvolvimentu,” nia orgullu.
Entretantu, grupu asosiasaun ualu ne’e maka hanesan, Asosiasaun Feto Mudánsa Ekonomia Família, (AFMEF), Uma Pas Oé-Cusse (UPO), ALFeLa (Asistensia Legál ba Feto no Labarik), PRADET TL, Justice System Monitoring Programme (JSMP), Asosiasaun Halibur Defisiénsia Matan Timor-Leste (AHDMTL), Fundasaun Sosiál Naroman (FUSONA) no Juventude Hadomi Oé-Cusse (JHO).
Purtantu, subvensaun públika ba siklu dahuluk ne’e ho orsamentu $240,322.69, sei hetan monitorizasaun hosi Komisaun Subvensaun Públika RAEOA iha nia períodu ezekusaun, aliende ne’e mós entidade benefisiáriu sei submete relatóriu periodikamente tuir regra ne’ebé iha.
Notísia relevante: PRADET Oé-Cusse husu PN aselera projetu lei protesaun labarik
Jornalista: Abílio Elo Nini
Editór: Evaristo Soares Martins
