DILI, 15 maiu 2023 (TATOLI)--Governu liuhosi Ministériu Finansa (MF) halo ona levantamentu daruak osan ho montante millaun $190 hosi fundu mina-rai, nune’e totál levantamentu millaun $490 to’o inísiu maiu 2023, hosi biliaun $1,3 ne’ebé Parlamentu Nasionál aprova ona liuhosi Lei Orsamentu Jerál Estadu (OJE) 2023.
“Levantamentu daruak adisionál ho montante millaun $190 ne’e, ita halo bazeia ba previzaun fluxu kaixa ba fulan-rua tuir-mai ne’ebé mak aprezenta hosi Diresaun Jerál Tezouru, Ministériu Finansa,” Ministru Finansa, Rui Augusto Gomes, hateten liuhosi nota ne’ebé Agência Tatoli asesu, segunda ne’e.
Notísia relevante : Retornu fundu mina-rai pozitivu iha trimestre dahuluk 2023
Governante ne’e informa, levantamentu millaun $490 ne’e menus hosi limite Rendimentu Sustentável Estimadu (RSE) hosi fundu mina-rai ba tinan 2023 no kumpre artigu 4, lei númeru 15/2022, 21 dezembru kona-ba OJE 2023.
Antes ne’e, iha inísiu fevereiru 2023, MF halo ona levantamentu ho montante dahuluk ho valór millaun $300 hosi fundu mina-rai hodi finansia mákina Estadu liuhosi OJE 2023.
Ezekusaun reál OJE 2023 ba Todo Governo ein termu nominál atinje ona millaun $389 hosi totál orsamentu biliaun $2,16 ne’ebé mak Parlamentu Nasionál aprova, iha loron 12 maiu.
Bazeia ba relatóriu ikus fundu mina-rai nian hosi Banku Sentrál Timor-Leste, to’o iha loron 31 marsu 2023, kapitál fundu mina-rai hamutuk biliaun $17,8.
Jornalista : Antónia Gusmão
Editora : Julia Chatarina
