iklan

EDUKASAUN, HEADLINE

MEJD submete ona lista estudante bolsa méritu rihun 5-resin ba BNCTL

MEJD submete ona lista estudante bolsa méritu rihun 5-resin ba BNCTL

Logotipu BNCTL. Imajen/Espesiál

DILI, 15 maiu 2023 (TATOLI) – Ministériu Edukasaun, Juventude no Desportu (MEJD) aprezenta ona lista estudante bolsa méritu hamutuk 5.190 ba Banku Nasionál Komérsiu Timor-Leste (BNCTL) atubele halo ona transferénsia osan ba estudante sira-nian konta bankária.

“Iha tersa semana kotuk ita submete ona lista estudante bolsa méritu na’in-5.190 ba BNCTL atubele hahú halo ona transferénsia osan ba sira-nian konta bankária”, Diretór-Jerál Edukasaun Ensinu, Luis Manuel da Costa Fernandes, informa ba Tatoli, iha Vila Verde, segunda ne’e.

Nia salienta katak estudante bolsa méritu hamutuk 8.381 mak seidauk submete sira-nia konta bankária no ministériu nafatin fó tempu atu sira ne’e bele trata lalais dokumentu sira.

“Ita sei fó tempu ba estudante 8.381 to’o jullu tinan ne’e tenke taka ona ninia prosesu, tanba Orsamentu Jerál Estadu ne’ebé prevee ba item ne’e sei fila ba kofre Estadu”, nia dehan.

Nune’e, dirijente ne’e esplika katak ba estudante sira ne’ebé maka lakohi esforsu hodi trata sira-nia dokumentu hodi hetan konta bankária to’o jullu ne’e remata maka sira ne’e sei lakon sira-nian direitu. Tanba ne’e nia husu ba estudante sira esforsu hodi hetan konta bankária, tanba akordu entre MEJD ho BNCTL, pagamentu osan ba estudante sira tenke liuhosi prosesu transferénsia ba konta ida-idak.

Tuir dadus husi MEJD, benefisiáriu ba bolsa méritu iha territóriu hamutuk 13.517 ne’ebé sei selu tuir nivel eskolaridade no sei tuir mós ninia kritériu sira ne’ebé maka konsagra ona iha manuál pagamentu bolsa refere.

Rekorde karak Ministru Edukasaun, Juventude no Desportu, Armindo Maia, orienta ona dirijente sira atu aselera pagamentu ba estudante benefisiáriu bolsa méritu sira ne’ebé maka iha ona konta bankária.

“Ha’u husu ona tékniku sira atu hala’o serbisu ho responsabilidade atubele rezolve asuntu ne’e ho lalais, nune’e iha tempu badak bele halo pagamentu ba estudante sira ne’ebé maka iha ona konta bankária”, ministru Armindo Maia hatete foin lalais ne’e, iha Palásiu do Governu.

Ba estudante benefisiáriu sira ne’ebé iha ona konta bankária, ministru garante katak sira-nia lista laiha ona problema, nune’e tenke hahú ona prosesu transferénsia osan ba konta bankária. “Tanba pagamentu ba benefisiáriu bolsa méritu ne’e kle’ur liu ona, espera katak molok mandatu Governu ne’e termina, sira ne’e bele hetan ona sira-nia direitu”, nia realsa.

Notísia relevante: MEJD sei aselera pagamentu ba benefisiáriu bolsa méritu ne’ebé iha ona konta bankária

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!