Membru PN husu autoridade seguransa prosesa autór kazu Lurumata tuir lei
DILI, 15 maiu 2023 (TATOLI)—Membru Parlamentu Nasionál (PN), liuhosi Deputadu bankada FRETILIN, Antoninho Bianco, husu ba autoridade seguransa atu prosesu tuir lei ba autór sira-ne’ebé envolve iha kazu hodi halakon joven ida-nia vida iha Lurumata, suku Fatuhada, postu administrativu Dom Aleixo, munisípiu Dili, sábadu (13/5).
Notísia Relevante: PNTL detein suspeitu sona mate Aires Celestino Adelaide iha Lurumata
“Ami haree aktu individuál labele liga fali ba organizasaun tanba kestaun dezentendimentu rua ka tolu sidadaun halo, entaun ida-ne’e krime. Kualkér aktu ne’ebé halo lakon ema nia vida ne’e krime individuál no ita atu hatene loloos tenke iha investigasaun ba autór sira hodi hatene kle’an liu,” Deputadu Bianco hateten ba jornalista sira iha PN, segunda ne’e.
Nia husu ba sidadaun hotu atu kontribui ba pás no estabilidade iha períodu kampaña eleitorál to’o loron eleisaun 21 maiu 2023.
Hatán ba akontesimentu deskonfia liga arte marsiál, nia hatán, bankada FRETILIN haree organizasaun arte marsiál hanesan parseiru dezenvolvimentu, nune’e tenke iha kapasidade atu organiza sira, nune’e halo ona lei hodi sira bele instala sira-nia nível organizasaun ninia responsavél sira hosi nasionál to’o baze hodi kontrola sira-nia membru.
Tamba ne’e, nis husu nafatin ba líder organizasaun sira atu oinsá kontrola nafatin membru sira hodi kontribui ba pás iha rai-laran.
Deputadu CNRT, Patrocínio Fernandes, hateten kazu ne’e hanesan ema hotu akompaña presiza autoridade seguransa buka tuir autór sira hodi prosesa tuir dalan legál ne’ebé iha.
Jornalista : Nelson de Sousa
Editór : Cancio Ximenes
