iklan

HEADLINE, KAPITÁL

MTKI lansa livru planu estratéjiku nasionál ba dezenvolvimentu turizmu 2023-2030

MTKI lansa livru planu estratéjiku nasionál ba dezenvolvimentu turizmu 2023-2030

Vise-Ministra Turizmu Komunitária no Kulturál, Inâcia da Conceicão Teixeira no Vise-Ministru Turizmu, Komérisu no Indústria, Domingos Lopes Antunes, hamutuk ho parseiru internasionál no nasionál sira lansa livru planu estratéjiku dezenvolvimentu nasionál turizmu tinan 2023-2030 nian, iha salaun Hotel Timor, segunda (15/05/2023). Imajen Tatoli/Francisco Sony

DILI, 15 maiu 2023 (TATOLI)—Ministériu Turizmu Komérsiu no Indústria (MTKI), segunda ne’e, lansa livru planu estratéjiku nasionál ba dezenvolvimentu turizmu 2023 to’o 2030.

Vise-Ministra Turizmu Komunitária no Kulturál, Inâcia da Conceicão Teixeira, hateten, planu ne’e lansa hafoin tinan 12 lansa Planu Dezenvolvimentu Nasionál Timor-Leste no tinan neen hafoin lansa Polítika Turizmu.

Vise-Ministra Turizmu Komunitária no Kulturál, Inâcia da Conceicão Teixeira. Imajen Tatoli/Francisco Sony

“Planu estratéjiku nasionál ba dezenvolvimentu turizmu ne’ebé ohin ita lansa ne’e ho vizaun atu dezenvolve Timor-Leste sai nu’udar país ho destinadu úniku iha Ázia tanba ita-nia misaun mak halo mudansa hosi polítika transforma ba asaun atu prense lakuna desde lansamentu planu estratéjiku nasionál,” Vise-Ministra hateten iha Hotel Timor.

Inisiativa ne’e sei fornese matadalan nesesáriu tebes hodi dezenvolve setór turizmu iha Timor-Leste.

“Ita-nia planu estratéjiku ne’e bazeia ba pilár lima ne’ebé hatuur nanis ona iha polítiku turizmu nian, mak ema (povu), propriedade, prospriedade, protesaun no parseiru,” nia akresenta.

Notísia relevante : Governu aprova Planu Estratéjiku Nasionál ba Dezenvolvimentu Turizmu

Pilár lima ne’e nesesáriu nu’udar xave ba avansu turizmu iha Timor-Leste, tanba povu nu’udar pilár sentru ba polítika no nu’udar vetór krusiál iha planu estratéjiku.

“Ita halo serbisu ne’e ba povu, ba timor-oan hotu, liu-liu profisionál, ita hakarak prospriedade, tanba ne’e turizmu sai nu’udar propriedade, turizmu nu’udar setór seluk ne’ebé mak iha potensialidade boot atu disamina no diversifika ekonomia inklui suporta dezenvolvimentu setór sosiál, ekonómia rai-laran. Timor-oan hakarak setór turizmu inkluzivu responsável nu’udar guia hodi fó protesaun ba nasaun nia diversidade no natureza ne’ebé puru hela ka seidauk book, istória ne’ebé riku no patrimónia kulturál ne’ebé forte,” nia tenik.

Diretór Jerál Turizmu, Jelino Soares. Imajen Tatoli/Francisco Sony

Governante ne’e dehan, planu estratéjiku nasionál ba dezenvolvimentu turizmu ne’e aliña ba vetor estratéjiku prioridade ba kada pilár polítika ninian maibé hatete katak atu alkansa ba misaun ne’e, presiza define klaru mata-dalan ba implementasaun.

“Ita hatene klaru desde inísiu presiza define duni, tanba ita hatene planu ne’e sei la susesu bainhira ita laiha definisaun klaru oinsá etapa sira atu hala’o, kronograma no parte sira ne’ebé interese inklui responsabilidade sira ne’ebé atu fahe, nune’e ita dezenvolve planu implementasaun ida ho atividade prioridade 100 ne’ebé sei implementa to’o tinan 2030, pasu 100 atu realiza ita-nia vizaun,” nia salienta.

Iha fatin hanesan, Diretór Jerál Turizmu, Jelino Soares, konsidera lansamentu planu estratéjiku ne’e hanesan momentu istória importante ba ministériu tanba dokumentu ne’e importante tebes atu dezenvolve setór turizmu iha Timor-Leste.

“Planu estratéjiku ida-ne’e sai hanesan giaun ida ba ita katak agora ita iha ne’ebé no oinsá atu to’o objetivu dezenvolvimentu turizmu ne’ebé di’ak hodi dezenvolve di’ak liután área turizmu nian,” nia otimista.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!