AINARO, 15 Maiu 2023 (TATOLI) – Sektretariadu Tékniku Administrasaun Eleitorál (STAE), munisípiu Ainaro konklui ona verifikasaun boletín votu eleisaun parlamentár hamutuk 53.250.
Diretór STAE munisípiu Ainaro, Francisco Bianco, informa prosesu verifikasaun ne’e hahú iha sábadu liubá, ne’ebé hetan supervizaun husi Komandante Polísia Nasionál Timor-Leste munisípiu Ainaro, Administradór munisipál, fiskál partidu polítiku sira, Komisaun Nasionál Eleisaun (CNE, iha portugés) no Providoria Direitu Umanu no Justisa.
“Livru ne’ebé ami simu hamutuk 1.065, ekivalente ba boletín votu hamutuk 53.250, maibé iha verifikasaun ne’e, ami identifika iha boletín votu tahan ualu laiha númeru seriál, tahan ualu iha seriál dupla, tahan sia ho kondisaun nakles no tahan tolu kuak. Sira ne’ebé ho kondisaun ladi’ak ita sei la utiliza iha loron eleisaun”, Francisco Bianco dehan ba Tatoli, iha Ainaro Vila.
Tuir nia, hafoin konklui verifikasaun STAE Ainaro hahú ohin halo kedas empakotementu ba materiál sensitivu no naun-sensitivu hodi distribui ba sentru no estasaun votu iha postu administrativu Ainaro Vila, Hatu-Builico, Hatu-Udu no Maubisse.
“Empakotementu materiál sira ne’e sei konklui, iha kinta-feira semana, ne’e no tuir planu, sei distribui ba sentru no estasaun votu sira iha loron-sábadu”, nia realsa.
Tuir dadus, STAE munisípiu Ainaro rejistu eleitór hamutuk 47.912, sentru votasaun 90 no estasaun votu 115.
Notísia relevante: STAE Bobonaro konklui verifikasaun ba boletín votu kaixa 15
Jornalista: Afonso do Rosário
Editora: Isaura Lemos de Deus
