MALIANA, 15 maiu 2023 (TATOLI) – Ekipa brigada Sekretariadu Tékniku Administrasaun Eleitorál (STAE), Munisípiu Bobonaro, segunda ne’e konklui ona verifikasaun boletín votu eleisaun parlamentár nian hamutuk kaixa15.
Diretór STAE Munisípiu Bobonaro, Mariano Viegas Amarál, informa prosesu verifikasaun ne’e hahú iha loron-sábadu liubá, ne’ebé hetan supervizaun hosi Komisaun Nasionál Eleisaun (CNE, sigla portugés), observadór KAUKUS no OIPAS no fiskál partidu polítiku sira.
Boletín votu ne’ebé halo verifikasaun bazea ba totál eleitór iha munisípiu Bobonaro aumenta tán 10% kada suku.
Notísia relevante: STAE Bobonaro identifika estrada ba sentru votasaun 36 presiza hadi’a
“Ohin dai 15 dadeer ne’e ita verifika ikus liu, iha verifikasaun ne’e iha tinta oan ruma mak iha-ne’ebá, iha emblema partidu ka naran sira-ne’e, entaun ita hamutuk ho observadór, fikál partidu sira, ita deside boletín ne’e antes distribui ba sentru votasaun ita tau kedas karimbu la uza iha oin, nune’e bainhira iha sentru votasaun sei la distrubui ita-nia eleitór sira,” nia informa ba Jornalista sira, iha Maliana, segunda ne’e.
Hafoin konklui verifikasaun sei kontinua kedas halo pakotementu materiál sensitive ba eleisaun parlamentár nian.
“Ita hahú hosi postu administrativu Atabae, Balibo, Bobonaro, Cailaco, depois Lolotoe no ikus liu postu administrativu Maliana. Materiál la’ós-sensitivu ita halo pakotementu remata tiha ona,” Diretór Mariano hateten.
Totál eleitór munisipiu Bobonaro ne’ebé elijível atu vota iha eleisaun parlamentár hamutuk 72.537, komposta hosi mane 37.335 (51%) no feto 35.202 (49%).
Notisia relevante: STAE Bobonaro husu sidadaun hotu partisipa resensiamentu eleitorál
Jornalista : Sérgio da Cruz
Editór : Evaristo Soares Martins
