BOBONARO, 18 janeiru 2023 (TATOLI) – Sekretariadu Tékniku Administrasaun Eleitorál (STAE), Munisípiu Bobonaro, tersa ne’e halo ona lansamentu ba atividade resensiamentu eleitorá Atualizasaun Baze de Dadus (REABD) hodi prepara ba eleisaun parlamentár periodu tinan 2023, nune’e husu sidadaun hotu partisipa.
STAE hala’o resensiamentu eleitorál bazea ba Lei N.o 19/2021, 8 Setembru, alterasaun dahuluk hosi Lei n.o 6/2016, 25 Maiu kona-ba Lei Resensiamentu Eleitorál.
Diretór STAE Munisípiu Bobonaro, Mariano Viegas Amarál, apela ba sidadaun hotu-hotu atu partisipa iha resensiamentu eleitorál nune’e bele ezerse direitu votu iha eleisaun parlamentár ne’ebé sei realiza iha tinan ne’e.
Notísia relevante: STAE Bobonaro planeia aumenta sentru votasaun 17 ba eleisaun parlamentár
“Oportunidade ba ita-boot sira hahú hosi 17 janeiru ba oin ne’e, husu ita-boot sira prepara ita-boot sira-nia dokumentu ba, liuliu Billete Identidade (BI), Sertidaun Nasimentu Moris (RDTL) no pasaporte. Dokumentu tolu ne’e iha mai rejistu ba hodi hetan kartaun eleitorál,” nia informa ba jornalista sira, iha kna’ar-fatin, Maliana.
Diretór Mariano subliña, atividade resensiamentu eleitorál ne’e tékniku sira sei hala’o mós iha postu administrativu idak-idak hodi fasilita sidadaun sira asesu besik liután.
Purtantu atividade REABD ne’e sei halo atendimentu ba sidadaun ne’ebé idade atinje ona 17 atu bele hetan kartaun eleitorál karik, muda fatin ka kartaun eleitorál tohar no lakon.
Hafoin halo lansamentu iha loron dahuluk, STAE konsege halo atendimentu ba sidadaun na’in-114 komposta hosi eleitór foun na’in 54 no eleitór tuan 60.
Númeru ne’ebé rekolla komposta hosi postu administrativu Atabae na’in-16, Balibo na’in-18, Lolotooe na’in-haat, Cailaco 11 no postu administrativu Maliana na’in-65, eleitór foun 32 no restante atualizadu.
“Ita-nia postu administrativu Bobonaro mak la konsege halo resensiamentu eleitorál tanba ahi mate horisehik to’o lokraik,” Mariano haktuir.
Enkuantu, númeru eleitór iha territóriu nasionál to’o iha fulan-dezembru 2022 hamutuk 878.712 ne’ebé kompostu hosi Aileu 34.706, Ainaro 46.945, Ataúro 2.600, Baucau 98.629, Bobonaro 72.811.
Nune’e mós Cavalima 48.830, Dili 192.934, Ermera 84.361, Lautém 49.380, Liquiçá 51.925, Manatuto 35.999, Manufahi 41.574, RAEOA 53.151 no Viqueque iha eleitór hamutuk 58.867.
Entretantu eleitór ne’ebé agora resensiadu no atualizadu iha diáspora hamutuk 6.944 ne’ebé komposta hosi Austrália iha eleitór hamutuk 1.462, Korea Súl 1.237, Irlandia Norte 2.185, Portugál 1.241 no Reinu Unidu iha eleitór hamutuk 819.
Notísia relevante: STAE Bobonaro rejista eleitór foun na’in-6.289
Jornalista : Sérgio da Cruz
Editór : Evaristo Soares Martins
