STAE deside la uza livru buletin votu hetan estragu iha Dare
COVALIMA, 15 maiu 2023 (TATOLI)—Diretór Sekretáriu Tékniku Administrasaun Eleitorál (STAE), Francisco Gusmão, hateten STAE hamutuk ho fiskál partidu polítiku sira deside la uza livru buletin votu ida (1) ne’ebé hetan estragu bainhira akontese insidenteDare-Mulu-Ainaro, sesta (12 maiu 2023).
Notísia Relevante: Karreta transporta materiál eleisaun ba Covalima hetan insidente iha Dare
“Brigada STAE ne’ebé hetan supervizaun hosi Komisaun Nasionál Eleisaun (CNE-sigla portugés) halo verifikasaun ba buletin votu ne’ebé transporta hosi Nasionál mai iha Covalima, iha sesta (12/05/23) tanba hetan insidente, bazeia ita halo identifikasaun livru buletin votu ida (1) ho nia folla ida nakles, nune’e ita deside hamutuk ho fiskál partidu polítiku sitra hodi tau karimbu la uza,” Francisco Gusmão hateten ba Agência Tatoli, iha nia kna’ar fatin, Kampung Baru, segunda ne’e.
Hafoin akontese insidente ne’e, iha sábadu (13/05/23), brigada STAE hetan supervisaun hosi CNE halo kedas verifikasaun ba buletin votu ne’ebé identifika livru buletin votu ida (1) ne’ebé iha nia folla ida nakles no la bele uza.
Ho nune’e, nia dehan, STAE hamutuk ho fiskál partidu polítiku tau karimbu labele uza livru buletin votu- da hetan estragu, relasiona ho insidénte ne’ebé akontese iha sesta (12/05/23) iha Dare-Mulu-Ainaro, nune’e livru buletin votu ida labele halo distribuisaun ba sentru votasaun sira.
“Iha domingu (14/05/23) ne’e, ita foti desizaun hamutuk kona-ba buletin votu ne’ebé hetan estragu iha livru ida mak ita tau karimbu la uza, restu ita uza hotu atu distribui ba sentru votasaun sira iha Covalima,” hateten.
Tuir dadus, STAE Covalima simu buletin votu hosi STAE nasionál iha loron sesta (12/05/2023) hamutuk 1,102 ho totál folla rihun 55,100.
Jornalista : Celestina Teles
Editór : Cancio Ximenes
