Xanana husu militante CNRT kria amizade ho partidu hotu-hotu
OÉ-CUSSE 14 maiu 2023 (TATOLI) – Prezidente Partidu Kongresu Nasionál Rekonstrusaun Timorense (CNRT), Kay Rala Xanana Gusmão, apela ba militante no apoiante sira atu hadomi malu, respeita ema seluk no kria amizade ho militante partidu hotu-hotu no hakribi violénsia hodi kontribui pás-estabilidade iha Timor-Leste.
“Husu ba imi hotu, ohin ita hamutuk iha ne’e, orsida fila ba idak-idak nia fatin, iha provokasaun oinoin, ha’u husu imi hakmatek hodi defende lialoos, hakribi violénsia, kuidadu joven atoni oan sira, tenke hatudu, katak CNRT partidu ida, ita hotu ho maturidade polítika,” Xanana Gusmão hato’o apelu ne’e bainhira remata kampaña eleitorál partidu CNRT iha Lifau Oé-Cusse, domingu ne’e.
“Ita lakoi odiu malu malu, maibé hakuak ema hotu, atu hadi’a ita-nia rai, hadomi malu, respeita ema seluk, ita tenke hakribi violénsia, kria amizade ho ema hotu-hotu, atu ita labele estraga malu no estraga ita-nia futuru,” nia fó hanoin.
Sekretáriu Jerál Partidu CNRT, Franscico Kalbuadi lay, reforsa tán, tinan ne’e Partidu CNRT moris tinan 16 ona iha Timor-Leste, maibé durante tinan 16 nia laran, la’ós partidu ne’e boot tanba ema barak de’it.
“Maibé partidu mós hatene, hanorin ninia militante, estrutura no simpatizante hotu-hotu, respeita ema seluk, hadomi mós ema seluk,” nia katak.
Purtantu, durante Partidu CNRT hala’o kampaña iha Oé-Cusse, situasaun la’o di’ak no kontroladu tanba hetan seguransa másimu hosi Polísia Nasionál Timor-Leste (PNTL), hetan mós supervizaun hosi Komisaun Nasionál Eleisaun (CNE, sigla portugés) no Provedoria Direitu Umanu no Justisa (PDHJ).
Notísia relevante: Xanana promete hadi’a lei kriasaun RAEOA-ZEESM
Jornalista: Abílio Elo Nini
Editór: Evaristo Soares Martins
