AINARO, 16 maiu 2023 (TATOLI) – Iha âmbitu implementasaun Planeamentu ba Dezenvolvimentu Integradu Munisipál (PDIM), Ministériu Administrasaun Estatál (MAE) liuhusi Diresaun Servisu Munisipál Ainaro simu ona proposta komunitária 30.
“Iha tinan ne’e ami simu ona proposta hamutuk 30 no agora daudaun iha ona faze preparasaun dezeñu Bill of Quantity (BoQ), hodi implementa iha 2024. Proposta sira ne’e atu konstrui no reabilita estrada rurál, ponte, eskola, kampu futeból no postu saúde”, Diretór Servisu Munisipál Ainaro, Alexandrino de Araújo Gomes, informa ba Tatoli, iha Ainaro Vila, tersa ne’e.
Nia dehan, hafoin konklui dezeñu BoQ, diresaun SMPID munisipál sei submete proposta ba MAE hodi halo transferénsia fundu, nune’e bele implementa projetu ne’e.
“Hafoin simu proposta sira ne’e, ami sei halo fali dezeñu BoQ hodi hatene valór orsamentu ba kada projetu. Iha prosesu verifikasaun ne’e mak projetu sira ne’e nia orsamentu liu $500.000 sei responsabiliza fali husi Diresaun Obras Públikas munisipál, tanba ami nia kompeténsia haree de’it ba dezenvolvimentu iha nível rurál”, esplika.
Diretór ne’e haktuir, proposta sira ne’e atu hadia estrada husi Raibere, iha postu administrativu Hatu-Udu, ba Gourema iha foho Kablake-Hun, hadi’a estrada husi Manumera ba Ai-Tutu, iha postu administrativu Hatu-Builiko, rehabilita estrada iha suku Manu-Tasi no estrada rurál iha suku Maulau iha postu administrativu Maubisse.
Aleinde ne’e sei hadi’a mós postu saúde sira iha suku Nunumoge, postu administrativu Hatu-Builiko, iha suku Kasa, postu administrativu Ainaro Vila, iha suku Manelobas postu administrativu Maubisse, inklui kanalizasaun bee moos ba komunidade sira iha suku Foho Ai-Liko, postu administrativu Hatu-Udu.
Notísia relevante: Autoridade Baucau selebra kontratu ho kompañia tolu implementa PDIM
Jornalista: Afonso do Rosário
Editora: Isaura Lemos de Deus
