Autoridade Covalima husu asosiasaun vítima kontinua identífika vítima 1974-1999
COVALIMA, 16 maiu 2023 (TATOLI)—Reprezentante Administradór Covalima, Francisco Mendonça “Tatamero”, husu asosiasaun vítima iha munisípiu Covalima atu kontinua indentifika vítima hahú tinan 1974-1999.
“Ha’u husu ba asosiasaun kontinua identífika oinsá mak ita-nia vítima-sira ne’e, bele hetan uitoan no beibeik maibé sira bele hetan hotu oportunidade atu hetan Uma Memória Esperansa modelu hanesan ho vítima Juliana dos Santos Alola nia uma,” Francisco Mendonça “Tatamero” hato’o liuhosi nia diskursu, iha serimónia inaugural Uma Memória Esperansa iha aldeia Asurai, suku Debos, postu administrative Suai, munisípiu Covalima, tersa ne’e.
Nia hato’o agradesimentu ba asosiasaun vítima ne’ebé identífika sidadaun ne’ebé uluk sai vítima iha funu laran hahú hosi 1974-1999 ne’ebé hetan torturasaun no hetan violasaun direitu umanu.
“Ha’u hato’o agradesimentu ba asosiasaun vítima hodi identifika ita-nia sidadaun ne’ebé uluk sai vítima iha funu ida-ne’e, hakarak ko’alia kona-ba vítima hotu ho laran no fuan boot simu hanesan vítima Juliana dos Santos Alola ida-ne’e mak konsekuénsia funu, ho ida-ne’e ohin loron ita goza. Ita konkista fali ita-nia ukun rasik-aan ne’ebé uluk 1975 ema seluk hadau, maibé ita kontinua funu nafatin to’o ikus ita-na’in konkista hodi manán fali funu,” nia dehan.
Maske ho situasaun halo fuan no laran dodok, maibé Estadu la haluha, timoroan ne’ebé sai vítima ba violasaun no halo torturasaun oioin, ikus mai imi bele hetan apoiu hosi Governu.
Prezidente Konsellu Veteranu Covalima, Osorio Soares “Mausoko”, rekomenda asosiasaun vítima la’ós ema na’in-ida no rua de’it, maibé balun la’ós vítima mós sira dehan sai vítima hanesan la’ós iha igreja no ba Indonézia mós dehan sai vítima
“Ho nune’e, dirijente asosiasaun vítima munisípiu Covalima tenke rejista didi’ak vítima, maibé rai ne’e lulik sei haree ita maske la’ós vítima mós dehan vítima,” nia rekomenda.
Koordenadór Nasionál Asosiasaun Vítima, Domingos Pinto de Araúju Moniz, hateten vítima sira kontinua kalma no pasiénsia nafatin neineik no beibeik, maske la promete sei iha meiu seluk atu bele ajuda.
“Vítima sira kontinua kalma no pasénsia nafatin neineik beibeik, ita la promete ba malu meiu seluk ita bele ajuda malu uitoan ita komesa konstrui ona uma ba vítima sira,” nia dehan.
Tuir dadus hosi asosiasaun vítima, vítima na’in–rua mak hetan ona apoiu uma hosi Governu liuhosi Centro Nacional Chega! (CNC).
Jornalista : Celestina Teles
Editór : Cancio Ximenes
