MANATUTO, 16 maiu 2023 (TATOLI)—Diretór Komisaun Nasionál Eleisaun (CNE) munisípiu Manatuto, Paulino Soares, hateten iha verifikasaun ba livru buletin votu ne’ebé CNE hamutuk ho Sektretariadu Tékniku Administrasaun Eleitorál (STAE) ho reprezenta partidu polítiku ne’e, identifika buletin votu tahan rua nakles no deside la uza iha Eleisaun lejislativa ne’e.
Notísia Relevante: Aban, STAE-CNE Manatuto hahú halo verifikasaun ba buletin votu
“Depois de verifikasaun hosi horisehik, ami identifika livru rua iha buletin votu tahan rua mak nakles. Livru ida buletin votu ida, nune’e kada livru ida buletin votu ida-ida,” Paulino Soares hateten ba Agência Tatoli liuhosi telefónika, tersa ne’e.
Nia dehan, reprezentante partidu polítika sira konkorda katak hosi buletin votu ne’ebé nakles ne’e tau karimbu la uza atu labele utiliza iha eleisaun parlamentár 21 maiu 2023.
“Ida-ne’e ami hato’o ba fiskál partidu polítiku sira no sira hatán katak buletin votu ne’ebé nakles ne’e sei tau karimbu la uza nian. Katak ita sei la uza iha eleisaun parlamentár agora,” nia hateten.
Hosi buletin votu ne’ebé nakles ona ne’e, Paulino hateten, sei iha buletin votu hamutuk 41.148 ne’ebé ho kondisaun di’ak hosi totál bulletin votu hosi nasionál hamutuk 41.150.
“Agora ita-nia eleitór elizivél iha Manatuto hamutuk 36.547, entaun ita iha buletin votu ne’ebé liu. Tanba hosi totál eleitór, ita sei aumenta 10% ba kada suku,” nia dehan.
Diretór CNE Manatuto ne’e haktuir, daudaun ne’e parte CNE ho STAE hamutuk ho fiskal partidu polítika sira halo hela pakotemente ba urna sira ba kada postu nian.
“Ita halo hotu ona pakotemente ba postu Barique, Laclo, Laclubar no sei falta mak Laleia, Manatuto Vila no Soibada. Parese to’o aban lorokraik, ita konklui ona no hein 20 maiu transporta ba sentru votasaun no estasaun votasaun sira iha suku no aldeia sira iha Manatuto,” nia dehan.
Tuir dadus, sentru votasaun iha Manatuto hamutuk 83 no estasaun votasaun hamutuk 98.
Jornalista : Osória Marques
Editór : Cancio Ximenes
