COVALIMA, 16 maiu 2023 (TATOLI)—Reprezentante Jerente Fundasaun Alola, José Ximenes, hateten Fundasaun Alola fó bolsa estudu ba vítima Juliana dos Santos nia oan ne’ebé agora daudaun hala’o hela estudu iha nasaun vijiñu Indonézia.
Notísia Relevante: CNC inaugura “Uma Memória Esperansa” ba vítima Alola iha Covalima
“Saida mak durante fundasaun alola apoiu ba vítima Juliana dos Santos “Alola” fó bolsa estudu ba nia oan eskola indonézia. Ita hotu nia esforsu organizaun hotu hanesan Ajar no ONG ne’ebé servisu ba feto luta ba Alola sai sidadaun Timor-Leste,” Reprezentante Jerente Fundasaun Alola, José Ximenes, hateten liuhosi nia diskursu bainhira partisipa iha serimónia inaugurasaun Uma Memória Esperansa” iha aldeia Asurai, suku Debos, tersa ne’e.
Fundasaun Alola iha nafatin kompromisu hodi fó apoiu ba vítima Juliana dos Santos “Alola” nia oan kontinua fó apoiu bolsa estudu, nune’e bele finaliza nia estudu.
Aleinde ne’e, Fundasaun Alola fó apoiu sasán dapur nian ba vítima Juliana dos Santos “Alola” hodi kompleta Uma Memória Esperansa ne’ebé Centro Nacional Chega! (CNC) konstrui iha postu administrativu Suai, munisípiu Covalima.
Fundasaun Alola fó apoiu sasán dapur nian mak hanesan sanan, taxu, kopu, bikan, kanuru no garfu, kama fatin toba kompleta ho kulxaun no seluk tan ne’e, bazeia ba kbiit ne’ebé iha tanba fundasaun la’ós haree ema na’in-ida de’it maibé fó apoiu mós ba feto vulneravél sira.
“Ami laiha buat barak atu oferese ba vítima Juliana dos Santos “Alola”, ami fó apoiu sasán sira hodi kompleta uma laran, bazeia ba kbiit ne’ebé fundasaun iha nune’e nia bele uza,” nia dehan.
Entertantu, Fundasaun Alola eziste iha nasaun Repúblika Demokratiku Timor-Leste ne’ebé hahú hamrik iha tinan 2001 ho ninia lema mak Feto Forte Nasaun Forte.
Objetivu mak atu ajuda feto no labarik iha Timor hodi asesu ba informasaun, rekursu no servisu ne’ebé sira presiza atu hetan moris saudavél no informasaun hirak ne’e bele naklekar iha komunidade nia le’et iha rai doben ida-ne’e
Fundasaun Alola implementa nia programa sira hanesan programa saúde inan no oan, programa edukasaun, programa dezenvolvimentu ekonomia no programa advókasia.
Jornalista : Celestina Teles
Editór : Cancio Ximenes
