COVALIMA, 16 maiu 2023 (TATOLI)—Centro Nacional Chegaǃ (CNC) hamutuk ho Asosiasaun Vítima Nasionál no autoridade sira iha munisípiu Covalima, tersa ne’e, inaugura uma Memória Esperansa ba vítima 1999 Juliana dos Santos “Alola” iha suku Debos, postu administrative Suai, munisípiu Covalima.
Notísia Relevante: Progresu konstrusaun “Uma Memória Esperansa” ba Alola atinje ona 25%
“Ha’u hato’o agradese ba Governu fó apoiu CNC liuhosi asosiasaun vítima ne’ebé ohin loron bele fó apoiu ba ita-nia vítima sira. Ita-nia Governu fó apoiu Uma Naroman ba povu (UNP), hanesan planu Governu hasai povu hosi mukit,” Reprezenta Administradór Munisípiu Covalima, Francisco Mendonça “Tatamero,” hateten liuhosi nia diskursu iha suku Debos, postu administrative Suai, munisípiu Covalima.
Aleinde Governu fó apoiu uma, nia dehan, Governu mós fó apoiu fundu ba asosiasaun sira nu’udar parseiru Governu atu bele identifika ema-ne’ebé vítima iha tempu funu, nune’e iha Covalima CNC fó apoiu ona uma memória esperansa ba vítima 1999.
Reprezentante autoridade Covalima ne’e mós husu asosiasaun vítima Covalima kontinua identifika vítima-sira, nune’e vítima sira bele hetan hotu oportunidade hodi hetan uma modelu hanesan ho vítima Juliana dos Santos “Alola” nian.
Reprezentante Diretór CNC, Padre Juvito Rego de Araujo hateten, iha serimónia inaugurasaun uma memória esperansa ne’e padre Juvito Rego mós konta istória kona-ba Juliana dos Santos “Alola” ho matan been hodi relembra hikas istória pasada.
“Ha’u sei hanoin hela memória di’ak ne’ebé Juliana dos Santos Alola iha ami-nia fuan. Ami nunka haluha, Governu estabele CNC atu bele implementa rekomendasaun sira CAVR no CVA ni’an atu kura kanek Timor nian, maibé kanek ne’e ita labele suku ho osan ho sasán, kanek hakarak rekuñesementu ida. Ohin, mai iha ne’e istórikamentu hakarak atu rekoñese de’it liuhosi Alola ho vítima sira seluk,” nia dehan.
Dirijente Asosiasaun Vítima Munisípiu Covalima, Maria Carvalho Amarál “Biki’ak”, reforsa durante prosesu konstrusaun uma memória esperansa hasoru dezafiu, tanba ho orsamentu ne’ebé naton defisil atu buka badaen sira hodi halo konstrusaun uma memória ba esperansa.
“Ami hasoru dezafiu boot durante atu halo konstrusaun, maibé badaen iha munisípiu Covalima lakohi hotu no badaen sira husu presu ne’ebé boot, maibé presu badaen ba uma memória ba esperansa ho presu ne’ebé ki’ik, ikus mai ami hetan no ohin konsege halo inaugurasaun duni,” nia dehan.
Ho apoiu hosi Asosiasaun vítima nia kaben konsege buka hetan badaen hosi Rejiaun Administrativa Espesiál Oé-Cusse Ambeno (RAEOA) na’in- rua mak halo konstrusaun uma memória esperansa ba Juliana dos Santos “Alola”
Ho nune’e, nia rekomenda ba Centro Nacional Chega! (CNC) atu labele hapara no fó apoiu nafatin vítima sira liuhosi konstrusaun “Uma Memória Esperansa”.
Benefisiáriu Juliana dos Santos “Alola”, hato’o agradesimentu ba Governu liuhosi CNC hamutuk ho asosiasaun vítima fó apoiu hodi konstrui uma memória esperansa ba nia.
“Ha’u hato’o agradesimentu ba Governu liuhosi CNC hamutuk ho asosiasaun vítima ne’ebé fó ona apoiu uma memória esperansa mai ha’u,” nia dehan.
Entertantu, uma memória esperansa ba sovrevivente Julia dos Santos “Alola” ho nia medida 7×9 ne’ebé lokaliza iha aldeia Asurai, suku Debos, postu administrativu Suai, munisípiu Covalima.
Orsamentu ba konstrusaun uma memória esperansa ne’e hosi Centro Nacional Chega! (CNC) ne’ebé alokadu hosi orsamentu jerál Estadu tinan fiskál 2022, kategoria iha transferénsia públika ho kustu kada uma-ida $14,000 ne’ebé kobre ba kustu konstrusaun no badaen mestre sira.
Konstrusaun uma memória esperansa ho nia medida 7×9 ne’ebé kompostu husi kuartu tolu ho medida 4×3 ho kuartu rua seluk ho medida metru 3×3, sala vizita ida, varanda ida, tolilet ida no dapur iha li’ur ho nia odamatan hamutuk neen (6).
Notísia Relevante: CNC sei konstrui “Uma Memória Esperansa” ba sobrevivente Alola iha Covalima
Jornalista : Celestina Teles
Editór : Cancio Ximenes
