DILI, 16 maiu 2023 (TATOLI) – Hametin kooperasaun no relasaun entre povu Korea no Timor-Leste, Embaixada Repúblika Korea iha Timor-Leste asina Memorandu Entendimentu (MoU, sigla inglés) ho Universidade Nasionál Timor Lorosa’e (UNTL).
Memorandu ne’e asina husi Embaxadór Korea iha Timor-Leste, Shin Mantaek no Reitór UNTL, João Soares Martins, iha sala konferénsia, UNTL, horseik.
Liuhusi MoU ne’e, Embaixada Korea no estabelesimentu ensinu públiku, UNTL, sei dezenvolve kooperasaun ne’ebé mak iha ligasaun Korea.
Diplomata Koreanu, iha serimónia ne’e, enfatiza ba importánsia edukasaun no kooperasaun akadémika.
Liután, “MoU ida-ne’e serve nu’udár momentu istóriku hodi haforsa liután lasu entre parte rua, no loke oportunidade ba estudante sira husi fakuldade oioin hodi hakle’an liután koñesimentu atravezde kooperasaun ida ne’e. No mós, estabelesimentu Center for Korean Studies iha UNTL ne’e iha signifikativu boot tebes”.
Reitór UNTL, João Soares Martins, hato’o nia apresiasaun ba embaixada Korea ninia apoiu ba promove ninia vizaun kona-ba promove kompriensaun, armonia no solidariedade entre kultura no povu, iha kontestu ida-ne’e, entre povu Korea no Timor-Leste.
“MoU ida ne’e loke kolaborasaun entre UNTL ho universidade sira iha Korea hodi kontribui ba dezenvolvimentu akadémika no kapasidade peskiza. No ida ne’e ita konta mós ho KOICA nia suporta,” reitór hateten, tuir komunikadu refere komunikadu UNTL Center for Korean Studies, ba Tatoli, ohin.
Autoridade másima UNTL reiteira, asina MoU entre Embaxada Korea no UNTL ne’e lori esperansa boot ba fornese plataforma ida ba kolaborasaun akadémika, haforsa liután lasu entre povu Korea no povu Timor-Leste.
Seremónia asinatura MoU ne’e partisipa husi ekipa reitória UNTL, Pro-reitór Asuntu Kooperasaun, ekipa husi Embaxada Korea, Vise-diretór Ajénsia Koreana ba kooperasaun internasionál (KOICA, sigla inglés), membru Board CKS (Center for Korean Studies), no seluktan.
Notísia relevante:KOICA apoiu funsionáriu hitu tuir programa bolsa estudu CIAT 2022
Tatoli
