Ministra Saúde inaugura edifísiu Servisu Saúde Viqueque
VIQUEQUE, 16 maiu 2023 (TATOLI)–Ministra Saúde, Odete Maria Freitas Belo, hamutuk ho Autoridade munisípiu Viqueque, tersa ne’e, inaugura edifísiu Servisu Saúde Viqueque.
Durante serimónia inaugurasaun, Ministra apresia profisionál saúde sira iha munisípiu Viqueque tanba halo ona kolaborasaun di’ak ho Ministériu Saúde nune’e bele reabilita uma Servisu Saúde ho kualidade.
“Ha’u agradese ba empreza ne’ebé halo konstrusaun uma ida-ne’e ho kualidade. Antes ne’e ha’u sisi kompañia aselera tanba Ministériu Saúde iha orsamentu maibé empreza sira maka konstrui tarde, nune’e afeta ba ezekusaun orsamentu. Tanba ne’e maka presiza aselera serbisu,” governante ne’e hateten liuhosi ninia diskursu iha edifísiu Servisu Saúde l, iha postu Viqueque Vila, tersa ne’e.
Notísia relevante : Servisu Saúde Viqueque rejista moras tuberkuloze 34 iha trimestre dahuluk
Aleinde ne’e, Ministériu Saúde planeia ona harii médiku sira-nia fatin dignu hodi bele fó asisténsia di’ak ba populasaun.
“Iha tinan 2020 ami halo dezeñu foun ba postu saúde neen inklui rezidénsia ba pesoál saúde sira. Polítika Ministériu Saúde maka suku sira iha Timor-Leste tenke iha postu saúde ida maibé ami foin harii postu saúde 300. Ita presiza tan 100 resin. Ami sei haree mós sentru saúde sira iha Timor laran tanba balun ho kondisaun ladún di’ak,” nia akresenta.
Nia husu profisionál saúde sira atu kuidadu no uza ho didi’ak fasilidade edifísiu foun ba tempu naruk.
Iha fatin hanesan, Administradór munisípiu Viqueque, Januário Soares ‘Bolly’, apresia ho inisiativa Ministériu Saúde.
“Ha’u agradese ba Ministériu Saúde ne’ebé bele reabilita ona ospitál tuan munisípiu Viqueque nian, nune’e pesoál saúde sira bele uza halo serbisu. Ha’u agradese ba empreza ne’ebé konsege reabilita uma ida-ne’e,” nia dehan.
Reabilitasaun edifísiu ho medida 606,42 m2, kompostu hosi sala neen no toilet, hahú ezekuta obra iha loron 02 fevereiru 2022 no ramata iha 01 maiu 2023, gasta orsamentu $200.882,49, ne’ebé toma konta hosi empreza Faneki.
Jornalista : Vitorino Lopes da Costa
Editora : Julia Chatarina
