DILI, 16 maiu 2023 (TATOLI)–Ministru Obra Públika, Abel Pires da Silva, informa, Governu planeia ona atu halo reabilitasaun estrada liga suku Humboe bá postu administrativu Letefoho, munisípiu Ermera.
“Kontente nu’udar Ministru Obra Públika atu deklara progresu estrada sira seluk daudaun iha ona prosesu konkursu nia laran oinsá atu buka empreza atualiza dezeña ba estrada liga Suku Homboe ba postu administrativu Letefoho,” Ministru hateten hafoin lansamentu dahuluk ba projetu reabilitasaun estrada liga postu administrativu Letefoho bá postu administrativu Hatubuilico, ne’ebé hala’o iha Letefoho, tersa ne’e.
Notísia relevante : MOP halo lansamentu fatuk dahuluk reabilita estrada Letefoho bá Hatubuilico
Dezeñu ba reabilitasaun estrada ne’e prodús kleur ona maibé Governu hasoru difikuldade ligadu ho indemnizasaun ba ai-horis no seluk tan, nune’e labele realiza.
“Dezeñu ba estrada ida-ne’e prontu kleur ona, ha’u hanoin povu Letefoho hatene ida-ne’e, maibé tanba razaun barak, razaun balun maka ha’u-nia inan no aman sira husu karun demais ba kafé hun ida, hali hun ida no kakeu hun ida, husu atu selu karun tebes entaun difikulta iha tempu ne’ebá atu implementa lalais,” nia akresenta.
Nune’e, tanba kleur oitoan entaun dezeñu ne’e mós la kondíz ona ho situasaun terrenu atuál tanba ne’e maka tenke atualiza.
“Maibé atualiza de’it ne’ebé sei lalori tempu naruk, daudaun prosesu la’o hela, la kleur hetan manán-na’in no tékniku sira hosi Ajénsia Dezenvolvimentu Nasionál (ADN) verifika avansa ba lansamentu dahuluk. Ha’u kalkula hosi esperiénsia ne’ebé mak iha parese iha tinan oin bele ona realiza lansamentu estrada hosi Humboe bá Letefoho,” governante ne’e tenik.
Aleinde ne’e, MOP mós prepara hela atu loke konkursu ba dezeñu projetu reabilitasaun estrada liga postu administrativu Letefoho bá postu administrativu Atsabe no Bobonaro.
“Dezeñu ne’e prontu desde tinan kotuk no ha’u fiar katak tinan ne’e bele lansa ona estrada importante ida-ne’e, tanba estrada ne’e sei benefisia tebes populasaun sira hodi hadi’a mors liuhosi negósiu kiik sira,” nia otimista.
Jornalista : Antónia Gusmão
Editora : Julia Chatarina
