iklan

ERMERA, HEADLINE, MUNISÍPIU

Reabilitasaun estrada liga Laga-Baguia la’o di’ak maski neneik

Reabilitasaun estrada liga Laga-Baguia la’o di’ak maski neneik

Ministru Obra Públika, Abel Pires da Silva. Imajen Tatoli /Egas Cristóvão

DILI, 16 maiu 2023 (TATOLI)–Ministru Obra Públika, Abel Pires da Silva, relata, progresu projetu reabilitasaun estrada liga postu administrativu Laga bá postu administrativu Baguia, munisípiu Baucau la’o di’ak maski la’o neneik.

“Ita iha mekanizmu oin-oin atu kontrola sira-nia progresu, durante ne’e ami iha komunikasaun semana-semana. Ami iha konfiansa katak ita bele haree projetu ne’e ho di’ak, no progresu ne’ebé iha la’o di’ak hela, mesmu neneik oitoan maibé kontinua nafatin,” Ministru hateten hafoin halo lansamentu fatuk dahuluk ba projetu reabilitasaun estrada ligasaun postu administrativu Letefoho bá postu administrativu Hatubuilico, ne’ebé hala’o iha Letefoho, tersa ne’e.

Notísia relevante : Kompañia hahú servisu reabilita estrada Laga-Baguia

Tuir Governante ne’e, empreza halo esforsu nue’e daudaun projetu la’o hela tanba projetu estrada la’ós buat kiik, liu-liu estrada liga Laga-Baguia.

“Projetu estrada Laga bá Baguia ne’e iha planu kleur ona, ida-ne’e halo estrada la’ós ba sosa masako iha kios ne’ebé lolo sentavu 50 ba ita hetan kedas masako,Projetu estrada mak hanesan ne’e ona, faze dahuluk empreza sira tenke hamoos lai no halo luan estrada para ekipamentu boot sira bele liu,” nia akresenta.

Nune’e, Ministru husu komunidade lokál atu koopera durante obra ne’e la’o tanba molok implementa projetu ida sei liu etapa oin-oin.

“Ha’u hanoin inan no aman sira kompreende ba, projetu ida-ne’e la’ós hanesan antes sira taka kuak de’it halai lakon ona, maibé ida-ne’e eleisaun hotu mós empreza sei kontinua halo to’o projetu ramata,” nia tenik.

Ministru klarifika, kona-ba empreza responsável projetu utiliza fali empreza seluk ninia ekipamentu pezadu ne’e depende ba jestaun ida-idak.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!