COVALIMA, 17 maiu 2023 (TATOLI)—Koordenadór Bee Timor-Leste, Empreza Públiku (BTL, E.P) Covalima, Castro Dody Ramos hateten, kuarta ne’e, tékniku Bee Timor-Leste, Empreza Públiku (BTL, E.P) Nasionál hamutuk BTL Munisípiu Covalima instala ona mákina bomba foun iha parte Sukabilaran, suku Suai Loro.
Notísia Relevante: BTL, E.P Covalima la distribui bee ba komunidade tanba bomba avaria
“Ami servisu hamutuk BTL, E.P Covalima ho Nasionál halo instalasaun bomba foun hodi troka ona mákina bomba ne’ebé avaria ne’ebé agora ita instala ona mákina bomba foun, nune’e bele distribui ona bee-moos ba komunidade iha área urbana,” Koordenadór BTL, E.P Covalima, Castro Dody Ramos, hateten ba jornalista sira, iha Sukabilaran, Suai Loro.
Antes ne’e, iha 9 maiu 2023 ne’e, mákina bomba iha parte Sukabilaran avaria nune’e BTL, E.P labele halo distribuisaun bee-moos ba komunidade iha área urbana iha munisípiu Covalima.
Nune’e, BTL, E.P haruka karta ba BTL, E.P nasional no ohin halo ona instasaun mákina bomba foun atu bele halo distribuisaun bee-moos ho normál ba komunidade sira iha área urbana iha Covalima.
Antes ne’e, komunidade iha área urbana zona 1 to’o 4 labele asesu bee moos ho normál durante semana ida tanba mákina avaria.
Koordenadór BTL, E.P mós husu diskulpa ba kliente sira-ne’ebe durante semana ida la asesu bee-moos tanba mákina bomba avaria.
Tuir planu, iha kinta (18 maiu 2023) aban, tékniku BTL, E.P sei hahú halo ona distribuisaun bee-moos ba komunidade iha área urbana ho normál, tanba instala ona mákina bomba foun.
Jornalista : Celestina Teles
Editór : Cancio Ximenes
