DILI, 17 maiu 2023 (TATOLI)—Eletricidade de Timor-Leste, Empreza Públika (EDTL, E.P) daudaun ne’e monta ona solár panél unidade 1.000 ba komunidade iha territóriu laran la inklui Dili.
Komisáriu Ezekutivu Servisu Tékniku no Vogál Konsellu Administrasaun EDTL, E.P, Latino Jerónimo, informa, solár panél ne’ebé sosa ba tinan ne’e hodi distribui no monta ba komunidade ne’ebé dook hosi liña ezistente hamutuk unidade 1.093, ikus liu iha munisípiu Manatuto iha loron-rua liubá konklui ona no hela unidade 93 mak seidauk monta.
“Solár panél unidade 93 ne’ebé seidauk monta ne’e loloos atu monta iha munisípiu Baucau maibé seidauk tanba kestaun estrada atu bá suku ne’ebé atu monta solár panél ne’e di’ak ona, entaun la monta no EDTL, E.P liga ahi liuhosi rede distribuisaun,” Komisáriu hateten liuhosi entrevista eskluziva iha estúdiu Agência Tatoli, Farol, kuarta ne’e.
Notísia relevante : EDTL,E.P sei distribui solar panel hamutuk unidade 1.091 ba komunidade
Nia dehan, empreza estatál ne’e sei halo fali asesmentu ba fatin seluk atu monta fali unidade 93.
“Distribuisaun solár panél ba de’it komunidade ne’ebé dook hosi estrada ka tinan-lima no 10 ona seidauk bele asesu estrada, ne’e mak bele hetan,” nia akresenta.
EDTL, E.P kontrata ona empreza SM Bark Unipesoal atu sosa solár panél ho orsamentu $413.617,30.
Jornalista : Arminda Fonseca
Editora : Julia Chatarina
