DILI, 17 maiu 2023 (TATOLI)—Eletricidade de Timor-Leste, Empreza Públika (EDTL, E.P) rekolla reseita hamutuk millaun $12,9, durante trimestre dahuluk, janeiru to’o marsu 2023.
“EDTL, E.P kobre reseita ne’ebé mai hosi fa’an pulsa eletrisidade, monta kontadór pre-pagu, ema aluga ai-rin no seluk tan,” Komisáriu Ezekutivu Servisu Tékniku Vogal Konsellu Administrasaun, Latino Jerónimo, hateten liuhosi entrevista eskluziva iha Estúdiu Agência Tatoli, Farol, kuarta ne’e.
Enkuantu, kona-ba progresu programa Projetu Eletifikasaun Nasionál iha nível suku daudaun ne’e atinje ona 94%.
Notísia relevante: Dadus provizóriu: kliente EDTL, E.P 2.060 simu ona pulsa eletrisidade $5
Nia esplika, hosi suku 59 ne’e EDTL,E.P promove hotu ona, no liuhosi pakote 34 kobre suku 23, kompostu hosi pakote 44 (suku 17) pakote 36 (suku 23), no pakote ikus foin lansa ba suku tolu, hanesan Fatukalu iha munisípiu Manufahi, suku Nanu’e (Covalima) no suku Fatumakerek (Manatuto).
“Suku tolu ne’e, lansa ona no nia progresu agora kontinua la’o. Hosi programa PEN ne’ebé EDTL, E.P promove ba suku 95, iha suku 29 mak asesu ona liña eletrisidade no aldeia 127 seluk prosesu sei kontinua la’o.
Komisáriu dehan, aldeia sira ne’ebé seidauk asesu liña eletrisidade, daudaun ekipa hamutuk ho líder komunitáriu hodi halo hela identifikasaun ba uma no distánsia.
“Bainhira ita identifika mak distánsia besik kilómetru ida ka rua hosi estrada boot ba aldeia sira ne’e, maka ekipa sei tun direitamente servisu hamutuk ho komunidade dada liña eletrisidade liuhosi Programa Eletrifikasaun Komunitáriu (PEK). Maibé haree ba distánsia dook, liu kilómetru rua, ita sei lori ba konkursu públiku,” Latino dehan.
Jornalista : Arminda Fonseca
Editora : Julia Chatarina
