NASIONÁL, EKONOMIA, HEADLINE

Governu hein garantia bankária empreza molok hatuur fatuk dahuluk projetu Aeroportu Comoro

Governu hein garantia bankária empreza molok hatuur fatuk dahuluk projetu Aeroportu Comoro

Ministru Finansa, Rui Augusto Gomes. Imajen Tatoli /Egas Cristóvão

DILI, 17 maiu 2023 (TATOLI)Governu daudaun ne’e hein hela garantia bankária hosi empreza manán-na’in ba projetu konstrusaun Aeroportu Internasionál Prezidente Nicolau Lobato, Comoro, molok atu hatuur fatuk dahuluk.

“Ita labele asina uluk kontratu ho empreza tanba sira seidauk fó mai ita garantia bankária, entaun kuandu sira la fó garantia bankária maka laiha baze ida atu dehan katak ita fiar sira no avansa ba asinatura. Tanba ne’e maka hein to’o agora, ne’ebé aban ka bainrua sira entrega maka ita bele avansa ba asinatura, se lae husik ba IX Governu mak realiza,” Ministru Finansa, Rui Augusto Gomes, hateten iha salaun Ministériu Finansa, Aitarak-laran, kuarta ne’e.

Maski nune’e, Governu iha ona kalendáriu atu realiza serimónia lansamentu fatuk dahuluk ba konstrusaun infraestrutura.

Lansamentu ne’e prevee ona iha loron 16 maiu 2023, so que ami hateten kedas katak enkuantu Governu seidauk asina kontratu ho empreza manán-na’in PT Waskita Karya, maka sei labele realiza lansamentu fatuk dahuluk tanba importante liu iha ne’e tenke asina uluk kontratu. Ida-ne’e maka garantia legál,” Ministru akresenta.

Notísia relevante : KM aprova prosedimentu aprovizionamentu konstrusaun infraestrutura Aeroportu Comoro

Governante ne’e konsidera, seremónia lansamentu ne’e nu’udar festa selebrasaun, maibé asinatura kontratu maka nu’udar baze legál ida molok empreza atu implementa projetu.

Antes ne’e, Governu define ona prosedimentu aprovizionamentu infraestrutura Aeroportu Comoro, nune’e hafoin liu prosesu naruk, empreza manán-na’in iha rua hosi Indonézia, kompostu hosi PT Waskita Karya sei haree ba konstrusaun infraestrutura ho totál orsamentu millaun $72,5, enkuantu empreza PT Amythas haree liu ba jestaun, ho orsamentu millaun $6,28.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!