PD planeia sei estabelese eskola ba peska nian iha Manatuto
MANATUTO, 17 maiu 2023 (TATOLI)—Sekretária Ezekutivu Partidu Demokrátiku (PD), Jacinto Barros Gusmão, hateten PD planeia sei estabelese eskola ba peska nian iha munisípiu Manatuto.
Notísia Relevante: PD promete sei tau fundu hodi reforsa dezenvolvimentu iha baze
“Iha Manatuto, PD hanoin atu halo eskola peska ida hodi dezenvolve área peska nian tanba Manatuto área ne’ebé luan hosi tasi feto to’o tasi mane. Nune’e, ita hanoin halo para estudante sira bele eskola no bele dezenvolve área peska,” nia hateten ba Tatoli, liuhusi telefónika, ohin.
Nia dehan, peska ne’e sei fó rendimentu di’ak ba peskadór sira, liuliu Manatuto-oan sira, tanba ne’e bainhira estabelese eskola peska nian mak estudante sira aprende barak liu kona-ba peska no sei mellora di’ak liután ba buat seluk.
“Nune’e mós, programa prioridade fatin tranzitu hosi Dili ba Manatuto, Baucau, Lautém no Viqueque, nune’e Manatuto tenke dezenvolve produtu lokál hanesan balisaun bainhira ema viajen dook hosi entre munisípiu hirak-ne’e,” nia dehan.
“Tenke halo restaurante ida iha ne’ebá, nune’e ema bele deskansa bá, no konsumu saída de’it mak iha restaurante ne’e,” nia hateten.
Aleinde ne’e, nia dehan, iha Postu Laclubar ho Natarbora presiza hadi’a no transforma setór agrikultura ba indústria, no iha área Paulaka gás mós iha nune’e sei tau prioridade gás iha Paulaka nian.
“Ida-ne’e prioridade ba Manatuto de’it, maibé ba nasionál ita nafatin hasa’e osan treseira idade. Kontinua fahe tratór tanba Manatuto setór agrikultór ne’ebé boot liu-liu iha Natarbora nian,” nia dehan.
Prioridade seluk mak hasa’e saláriu mínimu ba tralladór sira iha rai-laran no rai-li’ur, no PD nafatin fó kreditu ba estudante sira-ne’ebé iha vontade no hakarak kontinua estudu iha universidade.
“PD fiar an katak, tinan ne’e sei hetan kadeira 10-12 iha Parlamentu Nasionál no ukun ho partidu se de’it mak kaer ukun iha períodu ida-ne’e,” nia hateten.
Jornalista : Osória Marques
Editór : Cancio Ximenes
