iklan

NASIONÁL, HEADLINE, SEGURANSA

PNTL preparadu asegura Eleisaun Parlamentár 2023

PNTL preparadu asegura Eleisaun Parlamentár 2023

Vise-Ministru Interiór, António Armindo. Imajen Tatoli/Francisco Sony

DILI, 17 maiu 2023 (TATOLI)Vise-Ministru Interiór, António Armindo, hateten, Polísia Nasionál Timor-Leste (PNTL) preparadu tebes atu fó seguransa iha Eleisaun Parlamentár 2023, ne’ebé sei hala’o iha loron 21 maiu.

“Seguransa ba eleisaun ne’ebé sei hala’o, tuir ministériu nia haree di’ak, hotu-hotu preparadu bazeia ba planu operasaun ne’ebé Komandu operasaun halo. Ministériu Interiór seidauk simu lamentasaun no pedidu ruma hosi Komandu katak sira presiza saida-saida, maibé sira-nia hakarak maka transporte sufisiente atu sira bele uza, ne’ebé ami koordena malu atubele aloka transporte ba sira, ne’e rezolve daudaun ona,” Vise-Ministru, hateten iha Palásiu Governu, kuarta ne’e.

Notísia relevante : F-FDTL prepara membru rihun ida asegura situasaun emerjénsia iha eleisaun parlamentár

Governante ne’e dehan, membru Polísia ida hetan subsídiu alimentár $10 kada loron.

“Hanesan ita hatene, kualker operasaun sira hanesan ne’e membru sira parese iha subsídiu adisionál durante kampaña no eleisaun, ne’ebé kondisaun sira-nia di’ak hela, liga ho ekipamentu mós sufisiente tanba foin sosa iha tinan 2022, ne’ebé sira preparadu atu asegura seguransa iha eleisaun,” nia akresenta.

Nia afirma, Komandu PNTL iha meiu hotu atu ajuda membru sira maibé kuandu seidauk simu pedidu, signifika sira di’ak hela.

“To’o agora Ministériu Interiór seidauk hetan pedidu extra ruma hosi Komandu. Kuandu ida ne’e laiha naturalmente jestaun iha Komandu di’ak hela,” nia otimista.

Biban ne’e, governante ne’e apela ba membru Polísia hotu atu hala’o knaar ho responsabilidade no tuir papél ne’ebé atribui katak tenke proteje ema hotu, laiha diskriminasaun, inklui tenke imparsiál no neutru.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!