DILI, 12 maiu 2023 (TATOLI) – Komandu FALINTIL-Forsa Defeza Timor-Leste (F-FDTL) prepara membru rihun ida atu reforsa seguransa bainhira akontese kazu emerjénsia ruma iha ámbitu eleisaun parlamentár ne’ebé sei realiza iha 21 maiu.
Xefe Estadu-Maiór Jenerál F-FDTL, Tanente-Jenerál Falur Rate Laek, hateten forsa sira ne’ebé tuir parada militár iha Tasi Tolu, ohin, la’ós atu dezloka bá munisípiu, maibé atu reforsa seguransa bainhira akontese kazu emerjénsia ruma.
Tanente-Jenerál F-FDTL ne’e haktuir katak iha ona membru lubuk ida maka agora destaka iha nivel nasionál hamutuk ho Polísia Nasionál Timor-Leste (PNTL) hodi halo seguransa.
“Membru sira ne’ebé ohin tuir parada militár ne’e mai hosi batallaun rua de’it mak komponente navál, aéreo no terrestre hosi unidade FALINTIL, Polísia Militár, Formasaun Treinu no Apoiu Lojístika”, afirma.
Falur Rate Laek esplika katak hosi parada militár ne’e atu komprova kapasidade prontidaun no organizasaun bainhira akontese buat ruma no orden tun, membru sira preparadu ona atu ezekuta.
“Signifika Komandu F-FDTL preparadu iha oras 24 nia laran, tanba Estadu investe maka’as ona iha instituisaun defeza liuhosi formasaun lubuk ida inklui hetan mós apoiu hosi país parseiru sira iha dezenvolvimentu forsa, nune’e iha kualkér momentu saida de’it prontu atu serbí”, realsa.
Xefe Estadu-Maiór salienta katak servisu saida de’it mak kualkér membru ida atu halo importante maka tenke iha disiplina no profisionál, tanba disiplina maka hanesan sentinela ida atu asegura ema hotu ninia komportamentu iha prátika loroloron nian.
Notísia relevante: F-FDTL prontu apoiu PNTL asegura seguransa iha Eleisaun Parlamentár 2023
Jornalista: Tomé Amado
Editora: Maria Auxiliadora
