F-FDTL prontu apoiu PNTL asegura seguransa iha Eleisaun Parlamentár 2023

DILI, 24 fevereiru 2023 (TATOLI)—Vise Xefe Estadu Maiór Jenerál FALENTIL-Forsa Defeza Timor-Leste (F-FDTL), Majór Jenerál Calistro dos Santos ‘Coliati’, hateten bainhira iha pedidu hosi Governu mak komandu prontu apoiu Polísia Nasionál Timor-Leste (PNTL) hodi asegura seguransa iha Eleisaun Parlamentár (Elpar) 2023.

Notísia Relevante: Prezidente Repúblika dekreta loron eleisaun Parlamentár iha 21 maiu

“Laiha dúvida, desde iha ona pedidu hosi podér polítiku ba intervensaun forsa ninian, ami pronto. Tan ne’e, se iha ona pedidu atu fó apoiu ba polísia mak militár prontu apoiu polísia bele garante pás no estabilidade ba ita-nia rain, liu-liu asegura festa demokrásia eleisaun jerál, ida ne’e presiza ambiente ida hakmatek atu ita hotu-hotu bele ba fó ita-nia votu,” Vise Xefe Estadu Maiór Jenerál F-FDTL, Majór Jenerál Calistro dos Santos ‘Coliati’, hateten ba jornalista sira hafoin ramata enkontru ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, sesta ne’e.

Iha enkontru ne’e, nia dehan, ko’alia kestaun prinsipál relasiona ho eleisaun Parlamentár ne’ebé sei hala’o iha loron 21 maiu tinan ne’e, no parte komandu F-FDTL prontu apoiu PNTL bainhira iha pedidu.

“Kestaun prinsipál liga ba eleisaun jerál. Purtantu, sein dúvida seguransa maibé fórsa armada nia papél atu fó apoiu ba polísia nasionál. Ne’ebé, iha ne’e ami relata ba Prezidente katak iha aplikasaun forsa defeza atu apoiu ita-nia polísia ne’e forsa armada depende ba iha diretiva polítika,” nia hateten.

Bainhira iha orden polítiku, nia hateten, mak militár bele intevein tanba militár labele intervein arbiru bainhira laiha pedidu ruma.

Durante sorumutu, Vise Xefe Estadu Maiór Jenerál ne’e relata ba PR kona-ba kestaun defeza no seguransa ninian ne’ebé Timor-Leste hasoru iha territóriu nasionál.

Iha parte seluk, Xefe Estadu husu nafatin ba komandu F-FDTL liu-liu atu haree aplikasaun forsa iha terrenu hanesan Polísia Militár (PM) ninia intervensaun iha fatin atividade ne’ebé la’ós PM ninian.

“Prezidente Repúblika nu’udar komandante supremu, nia hato’o preokupasaun sira-ne’e ba komandu bele konsidera bainhira halo aplikasaun,” nia dehan.

Kona-ba preokupasaun ne’e, tuir nia, hanesan instituisaun ida ka komandu iha regra rasik oinsá atu bele orienta militár sira atu komanda iha ida-idak nia nivel, no se iha ezekusaun kontráriu ba orden mak sempre iha sansaun.

Kalendáriu eleisaun parlamentár 2023

1. Loron 5 fulan-marsu, harii koligasaun partidária no komunikasaun ba CNE
2. Loron 15 fulan-marsu, aprezentasaun lista kandidatura ba STJ/Tribunál Rekursu
3. Loron 25 fulan-marsu, STJ/Tribunál Rekursu verifika kandidatura sira (regularidade prosesu, autentisidade dokumentu, elejibilidade kandidatu sira) no notifikasaun ba reprezentante kandidatu sira
4. Loron 26 fulan-marsu, interpozisaun/aprezentasaun rekursu ba koletivu STJ/Tribunál Rekursu kontra desizaun admisaun/rejeisaun kandidatura sira nian
5. Loron 28 fulan-marsu, koletivu STJ/Tribunál Rekursu deside kona-ba rekursu ne’ebé aprezenta ba desizaun admisaun/rejeisaun kandidatura sira-nian
6. Loron 27 ka loron 29 fulan-marsu, publikasaun iha Jornál Repúblika kona-ba kandidatura sira ne’ebé admite ona ho definitive
7. Loron 28 ka loron 30 fulan-marsu, sorteiu ba kandidatura sira-ne’ebé admite ona hodi atribui ordenasaun iha buletin votu + afiksasaun/publikasaun akta. Harii sentru votasaun no estasaun votu nian
8. Loron 21 fulan-abril, STAE divulga númeru no fatin ba sentru votasaun no estasaun votu nian. 

KAMPAÑA ELEITORÁL 

9. Loron 19 fulan-abril to’o loron 18 fulan-maiu, períodu ba kampaña eleitoral. Eleisaun no apuramentu rezultadu.
10. Loron 21 fulan-maiu, loron eleisaun (tuku 07h00 daeersan to’o tuku 15h00 lorokraik).

LORON ELEISAUN

11. Loron 21 fulan-maiu, hahú kontajen ba votu iha sentru votasaun no tuirmai haruka urna sira ba apuramentu Munisipál/Rejionál
12. Loron 21 fulan-maiu, hahú kontajen ba votu no apuramentu rezultadu iha sentru votasaun sira iha rai-li’ur
13. Loron 21 to’o loron 23 fulan-maiu, apuramentu rezultadu iha nivél Munisipál/Rejionál no haruka akta eleitorál no mós elementu sira seluk (votu reklamadu no aprezenta reklamasaun) ba CNE.

Notísia Relevante: Partidu 24 sei konkorre iha eleisaun parlamentár 2023

Jornalista : Nelson de Sousa

Editór       : Cancio Ximenes