Embaixadór Fransa hakarak estabelese kooperasaun ho Timor-Leste iha área barak
DILI, 06 Novembru 2026 (TATOLI)—Embaixadór Fransa ba Indonézia, Timor-Leste no ASEAN, Fabian Penone hasoru malu ho Ministru Defeza, Kontra Almirante Donaciano do Rosário da Costa Gomes ‘Pedro Klamar Fuik’ hodi ko’alia kona-ba kooperasaun.
“Fransa hakarak fó apoiu hotu, hakarak estabelese kooperasaun ne’e liuhusi área barak ba formasaun, área ezersísiu, área vizita navios, área kapasitasaun rekursu umanus no área barak. Ida-ne’e mak sira hakarak halo liliu sira hakarak atu harii saida mak Timor-Leste bele mós kontribui ba sira ein termus kooperasaun la’ós ita mak simu de’it, maibé ita mós fó,” Ministru Defeza, Kontra Almirante Donaciano do Rosário da Costa Gomes ‘Pedro Klamar Fuik’ hateten ba jornalista sira hafoin simu vizita kortezia husi Embaixadór Fabian Penone iha sala enkontru Ministériu Defeza, Fatuhada, Sesta ne’e.
Notísia relevante : Fransa fortalese kooperasaun bilaterál ho TL iha área kultura-edukasaun-gastronomia
Nia dehan, Fransa no Timor-Leste partilla valór komún, hanesan integrasaun ba Timor-Leste ASEAN, nune’e Embaixadór hakarak haree enkuadramentu ne’ebé di’ak no seguru ein termu pontu de vista globál no rejionál.
Ministru ne’e konsidera Timor-Leste nu’udar nasaun ne’ebé bele garante estabilidade seguransa iha rejiaun Sudeste Aziátiku.
Aleinde ne’e, Ministru no Embaixadór ko’alia mós kona-ba situasaun jeoseguransa ne’ebé daudaun ne’e akontese iha mundu.
“Ita haree problema iha Europa, iha médiu oriente, ita mós haree iha problema iha ASEAN, iha Ázia, ita lakohi problema sira ne’e hotu atu sai konflitu, entaun tenke ser iha diálogu, tenke ser iha jestaun di’ak ba problema sira hotu para labele dezenvolve konflitu. Porke sai konflitu, afetadu liu mak populasaun, povu. Tanba ne’e mak líder hotu buka dalan atubele evita konflitu, kuandu bainhira iha problema, iha dezentedimentu entaun buka diálogu. Ohin ami ko’alia hotu asuntu sira ne’e hotu hanesan sira fó hatene katak Timor-Leste adere ba pás no ba estabilidade, adere ba dezenvolvimentu,” nia akresenta.
Governante ne’e mós afirma katak Timor-Leste laiha inimigu no laiha amigu epesiál, nune’e hotu-hotu ba Timor-Leste ne’e hanesan.
“Timor -Leste laiha referénsia, preferénsia ruma tantu ba Fransa ka ba Estadus Unidus Amérika ka ba Portugal ka Indonézia ka ba Austrália, hotu-hotu hanesan, depende termu de kooperasaun ne’e saida mak ita bele halo hamutuk,” nia hato’o.
Iha biban ne’e, Embaixadór Fabian Penone, reforsa katak vizita ne’e atu ko’alia kona-ba oinsá atu reforsa kooperasaun ho Timor-Leste ba futuru.
Nia mós agradese ba Ministru Pedro Klamar Fuik ne’ebé bele simu nia ho di’ak iha enkontru kortezia ne’e hodi ko’alia asuntu barak.
Jornalista : Natalino Costa
Editora : Julia Chatarina
