VIQUEQUE, 17 maiu 2023 (TATOLI)—Postu Saúde Loi-Ulu, suku Loi-Ulu, postu Uatucarbau, Munisípiu Viqueque rejista moras Infensaun Vias Respiratóriu Aguda (ISPA) hamutuk 229 durante fulan-haat, hahú janeiru to’o abríl 2023.
“Durante fulan-haat ne’e moras ne’ebé a’as liu maka ISPA, moras sira seluk ne’e númeru tun,” Xefe Postu Saúde Loi-Ulu, Aurora da Silva, informa, iha ninia knaar fatin, kuarta ne’e.
Aleinde ne’e, rejista mós moras dermatitis 10 durante fulan-haat, ne’ebé pesoál saúde sira fó ona tratamentu antibiótiku ba pasiente sira.
“Ami-nia stock ai-moruk ne’ebé iha, ami rasik maka tun ba sentru saúde para bele foti no dala ruma ambulánsia maka lori mai. Nune’e daudaun ne’e ami-nia stock ai-moruk sufisiente hodi halo atendementu ba abitante sira,” nia akresenta.
Notísia relevante : Abríl: Klínika Bairo Pite rejista moras ISPA hamutuk 532
Nune’e mós, pesoál saúde sira halo atendimentu ba kazu emerjénsia iha pasiente nia rezidénsia rasik, iha suku Loi-Ulu tanba limitasaun fatin iha postu saúde.
“Bainhira iha kazu emerjénsia ruma, ami direta bá halo observasaun iha pasiente sira-nia uma maibé kuandu grave oituan maka ami bolu ambulánsia hodi halo transfénsia bá sentru saúde,” nia akresenta.
Nia esplika kona-ba programa bolsa estudu ba jerasaun foun ne’ebé rejista iha postu saúde ba labarik ho idade 0-3, daudaun labarik 62 asesu ona.
“Daudaun ne’e iha suku Loi-Ulu iha inan isin-rua maka ami seidauk rejista iha ami-nia postu. Inan isin-rua iha ne’e na’in-lima, maibé kartaun eleitorál hosi munisípiu seluk,” nia dehan.
Tuir dadus, populasaun iha suku Loi-Ulu hamutuk 669, enkuantu pesoál saúde ne’ebé serbisu iha Postu Saúde Loi-Ulu hamutuk tolu kompostu hosi enfermeira, parteira no saúde públika.
Jornalista : Vitorino Lopes da Costa
Editora : Julia Chatarina
