VIQUEQUE, 17 maiu 2023 (TATOLI)—Ministra Saúde, Odete Maria Freitas Belo, halo vizita ba Sentru Saúde Uatucarbau, munisípiu Viqueque no identifika fasilidade saúde ho kondisaun a’at no menus rekursu umanu.
“Ita halo vizita ba fasilidade saúde sira. Ita sei haree sentru saúde Uatucarbau ne’ebé ho kondisaun a’at, nune’e tinan oin ita bele tau orsamentu,” Ministra hateten iha postu Uatucarbau, kuarta ne’e.
Aleinde ne’e, governante ne’e nota mós katak Sentru Saúde Uatucarbau menus rekursu umanu no fasilidade médiku.
Notísia relevante : Sentru saúde Uatucarbau rejista ISPA 1.000 durante fulan-hitu
Daudaun iha médiku tolu, parteira haat, enfermeiru 11, asistente enfermeiru ida, dentista rua, farmasista rua, inklui analista ida mak daudaun servisu iha sentru saúde no postu saúde iha Uatucarbau.
“Durante vizita, ha’u bá haree rai ne’ebé abitante suku Loi-Ulu oferese ba Ministériu Saúde hodi harii postu saúde no rezidénsia ba pesoál saúde sira. Entaun sei hahú konstrusaun postu saúde ida ba suku Loi-Ulu iha tinan 2024,” nia akresenta.
Iha fatin hanesan, Administradór postu Uatucarbau, Alfredo dos Santos, agradese ba Ministra Saúde ne’ebé ho inisiativa mai vizita ona postu hodi bele haree kondisaun.
“Espera Ministra bele aumenta médiku tanba iha ne’e iha médiku tolu de’it. Nune’e presiza aumenta hodi halo atendimentu ba povu Uatucarbau. Ha’u mós husu nafatin ba Ministériu hodi hadi’a sentru saúde tanba ho kondisaun a’at durante tinan barak, agora ita haree rasik bainhira tempu udan tama ba uma-laran, plafon sira dodok no fíziku uma nian a’at,” Autoridade suku dehan.
Tuir dadus hosi Ministériu Saúde, populasaun iha postu Uatucarbau iha tinan 2021 hamutuk 7.669, kompostu suku Irabin de Baixo 2.708, Irabin de Cima 670, Uani Uma 1.632, Afaloikai 617 no Lui-Olu 669.
Jornalista : Vitorino Lopes da Costa
Editora : Julia Chatarina
