OÉ-CUSSE 17 maiu 2023 (TATOLI) – Sekretariadu Tékniku Administrasaun Eleitorál (STAE), Rejiaun Administrativa Espesiál Oé-Cusse Ambeno (RAEOA), daudaun ne’e, prepara ona transporte 50 hodi tula materiál sensitivu no la’ós-sensitivu ba sentru votasaun 80 iha terrtóriu Oé-Cusse.
Notísia relevante: IGE Oé-Cusse hahú hadi’a estrada asesu ba sentru votasaun
“Agora daudaun ne’e ita prepara karreta Estadu atu tula materiál sensitivu no la’ós-sensitivu hamutuk 37, no karreta aluger hamutuk 13, ne’ebé ita-nia transporte atu tula materiál sira hamutuk 50,” Diretora STAE Oé-Cusse, Luiza da Costa, informa ba Agência Tatoli iha Oé-Cusse, kuarta ne’e.
Nia hatutan, transporte Estadu 37 ne’e, sei aloka mai hosi Autoridade RAEOA, tanba antes ne’e, parte STAE submete ona pedidu no konfirmadu ona, hein loron determinasaun atu transporta ba sentru votasaun sira.
Dirijente STAE Oé-Cusse, konfirma, kona-bá preparasaun verifikasuan materiál sensitivu no la’ós-sensitivu konklui no kontinua kedas ba pakotementu.
“Rezultadu verifikasaun ita finaliza ona, agora ba pakotementu sei kontinua serbisu, ita sei konklui iha kinta, depois mak ita fó rezultadu verifikasaun, boletín hira mak uza no la uza, tanba durante verifikasaun, hetan akompaña hosi fiskál partidu polítiku, CNE no PNTL, ne’ebé situasaun la’o di’ak,” nia katak.
Nia fundamenta, materiál hirak-ne’e, daudaun ne’e iha hela fatin apuramentu RAEOA nian iha salaun Alfándega Palaban, hetan asegurasaun hosi Polísia Nasionál Timor-Leste (PNTL).
Entretantu, totál ofisiál eleitorál iha Oé-Cusse na’in-1.150 hodi destaka iha sentru votasaun 80 no estasaun votasaun 115 estabelese ona iha territóriu Oé-Cusse.
Ho totál eleitór elijível atu partisipa eleisaun iha loron 21, fulan-maiu tinan 2023 hamutuk 54.291, komposta hosi mane 27.681 no feto 26.610.
Notísia relevante: STAE sei elimina ofisiál eleitorál envolve partidu polítiku
Jornalista : Abílio Elo Nini
Editór : Evaristo Soares Martins
