OÉ-CUSSE 08 maiu 2023 (TATOLI) – Diretór Sekretariadu Tékniku Administrasaun Eleitorál (STAE) Nasionál, Leonardoo Amarál, fo sai katak, STAE nasionál daudaun ne’e informa ona munisipíu sira, liuliu ba ofisiál eleitorál sira atu servisu ho transparánsia neutralidade iha ámbitu eleisaun lejizlativu ne’e hahú hosi prosesu eleisaun to’o kontajen votasaun.
Leonardo Amarál hato’o apelu ne’e, bainhira hala’o abertura formasaun ba ofisiál eleitorál ka poling-staf sira iha sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), segunda ne’e.
Notísia relevante: STAE Oé-Cusse sei rektruta ofisiál eleitorál 1.150
“Objetivu hosi formasaun ne’e, nune’e destaka ita-nia ofisiál eleitorál sira iha sentru votasaun, bele kompriende idak-idak nia kna’ar, tanba iha sentru votasaun ida ema na’in-10 ho kna’ar la hanesan, tan ne’e ami hosi nasionál mai reforsa formadór balun, nune’e akompaña iha formasaun ne’e,” Diretór STAE nasionál, Leonardo Amarál hateten.
Diretór ne’e esplika, matéria prinsipál iha formasaun ne’e maka prosesu votasaun kontajen votu no prienximentu akta no formuláriu, tanba prosesu prienxe akta ne’e sensitivu, tanba sai rezultadu ba iha munisipál ba no kontinua ba iha ha apuramentu nasionál, depois ikus mai nia rezultadu ba ikus iha Tribunál Rekursu, tan ne’e STAE laiha mudansa ruma hosi sentru votasaun sira.
Ne’ebé bazea de’it manuál hosi ofisiál sira hakerek ona iha sentru votasaun ba prenximentu akta, ida-ne’e mak sei ba to’o nia finál,
“Hosi nasionál informa ona ba munisipíu hotu, katak laiha ofisiál ida envolve iha partidu, ami sei elimina, tan ne’e ofisiál sira tenke tau sira-aan ho imparsialidade, transparánsia no neutralidade, tanba bainhira ita tama ona iha STAE, ita parte ona ba orgaun eleitorál la servisu ba partidu ida maibé servisu ba partidu polítiku sira hotu,” nia katak.
Notísia relevante:STAE fó formasaun ba ofisiál eleitorál 420 iha Maliana
Formadór Gregorio do Santos Neno, hosi STAE Oé-Cusse, hatete, formasaun ba ofisiál eleitorál sira iha Pante Makasar, realiza durante loron rua hahú segunda to’o tersa ne’e, enkuantu ba sub-rejiaun Oésilo, Pássabe no Nítibe konklui ona.
Nune’e nia husu ba ofisiál eleitorál sira persiza imparsialidade no neutralidade iha loron eleisaun no kontajen votasaun.
“Ha’u nia lia-menon ba poling staff sira tomak, katak ofisiál eletorál servisu tenke kaer metin moto STAE nian, tenke neutru, imparsiál, no transparánsia, ne’e duni presiza rai ita-nia partidu iha idak-idak-idak nia laran, katak ita tama ona iha STAE, ita tenke netru,” nia fo hanoin.
Entretantu, totál ofisiál eleitorál ka polig staff sira iha Oé-Cusse hamutuk 1.150 hodi destaka iha sentru votasaun 80 no estasaun votasaun 115 mak estabelese ona iha territóriu Oé-Cusse.
Ho totál eleitór elijivel atu partisipa eleisaun iha loron 21 fulan maiu tinan 2023 ne’ebé STAE rejista daudaun hamutuk 54.291, mane rihun 27.681 no feto feto 26.610.
Notísia relevante: Ofisiál eleitorál hala’o edukasaun votante iha Oé-Cusse
Jornalista: Abílio Elo Nini
Editór: Evaristo Soares Martins
