DILI, 17 maiu 2023 (TATOLI)—Ministra Negósiu Estranjeiru no Kooperasaun, Adaljiza Albertina Xavier Reis Magno, aprezenta projetu rezolusaun iha reuniaun Konsellu Ministru (KM), ne’ebé hetan ona aprovasaun, kona-ba akordu kooperasaun entre Estadu rua.
“Konsellu Ministru aprova projetu rezolusaun Governu, kona-ba akordu kooperasaun entre Estadu Repúblika Demokrátika Timor-Leste no Kuwait kona-ba Estabelesimentu Komité Konjuntu,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, kuarta ne’e.
Notísia relevante : PR Horta enkontru ho investidór EUA no Kuwait
Estabelesementu komité konjuntu ne’e ho objetivu atu dezenvolve relasaun bilaterál entre nasaun rua ho misaun atu realiza konsulta no koordena kestaun polítika ba interese komún nian.
Aleinde ne’e, atu dezenvolve no akompaña prosesu kooperasaun iha área ekonomia, komérsiu, investimentu, finansa no área sira seluk ne’ebé iha ligasaun atu promove kooperasaun iha área kultura, siénsia, informasaun, saúde no servisu sosiál, inklui atu fó kontinuasaun ba implementasaun akordu no programa kooperasaun sira ne’ebé halo ona entre nasaun rua-ne’e.
Jornalista : Antónia Gusmão
Editora : Julia Chatarina
