DILI, 18 maiu 2023 (TATOLI) – Estudante Universidade Nasionál Timor Lorosa’e (UNTL) hamutuk 264 ne’ebé ameasadu deziste ka drop out hosi universidade halo fali ona inskrisaun hodi kontinua sira-nia estudu.
“Ha’u hakarak informa katak daudaun ne’e ita iha ona estudante kuaze 264 hosi rihun 17-resin ne’ebé la ativu ne’e hahú halo ona prosesu inskrisaun. Estudante sira ne’e halo reinskrisaun ne’e hahú hosi semestre rua to’o lima”, Vise-Reitór Asuntu Akadémiku no Garantia Kualidade hosi UNTL, Samuel Freitas, hatete iha kampus sentrál, kinta ne’e.
Samuel Freitas relembra katak UNTL anunsia iha tinan 2022 ba estudante sira ne’ebé abandona eskola atu hakbesik-aan hodi halo reinskrisaun ne’ebé universidade loke fali ba ninia estudante rihun 17-resin.
“Bainhira reinskrisaun ne’e maka kontinua la’o, signifika estudante sira ne’ebé durante ne’e abandona tiha estudu iha UNTL bele kontinua eskola hanesan baibain. Ida ne’e polítika akadémiku nian atu hakarak lori nia estudante rihun 17-resin ne’e tama fali iha UNTL”, katak.
Vise-reitór ne’e mós esplika katak universidade sei loke oportunidade ba estudante sira ne’ebé la ativu ona no iha ona semester 30, signifika balun tinan 15 la kontinua eskola ne’e bele halo reinskrisaun. “Dalan úniku ne’ebé UNTL permite ba estudante sira atu halo inskrisaun maka tenke liuhosi prosesu readmisaun ne’ebé universidade sei halo dala rua iha tinan ida ne’e, hahú hosi semester par to’o impar”.
Tuir Samuel Freitas, UNTL iha estudante la ativu kuaze rihun 17-resin no bainhira sira ne’e halo fali inskrisaun signifika iha baze dadus universidade nian iha estudante hamutuk rihun 40-resin.
Nune’e prosesu readmisaun ba estudante la ativu sira ne’e UNTL sei loke oportunidade ba to’o iha fevereiru 2024. “Karik to’o durasaun tempu ne’ebé determina maka estudante sira ne’e la halo inskrisaun, sira bele tama ona kategoria drop out. Universidade sei la simu tan sira-nia prosesu tomak”, salienta.
Tanba ne’e, vise-reitór apela nafatin ba estudante sira ne’ebé la ativu ona atu kontinua fali estudu, tanba oportunidade reinskrisaun hahú hosi tinan ida ne’e to’o fevereiru 2024 hodi bele hahú fali eskola.
Notísia relevante: Estudante UNTL 47% tama iha rejime pre-inskrisaun
Jornalista: Tomé Amado
Editora: Maria Auxiliadora
