STAE no CNE Viqueque halo destruisaun materiál Eleisaun Prezidensiál 2022
VIQUEQUE, 19 maiu 2023 (TATOLI)—Sekretariadu Tékniku Administrasaun Eleitorál (STAE), Komisaun Nasionál Eleisaun (CNE, sigla portugés) no entidade relevante, sesta ne’e, halo distruisaun materiál eleisaun no buletin votu ba Eleisaun Prezidensiál 2022 primeira no segunda volta.
STAE hetan despaixu hosi Tribunál Rekursu iha loron 03 maiu 2023 ho númeru referénsia TR/GP/v/2023/059 hodi aprova prosedimentu ba territóriu Timor-Leste hodi halo destruisaun materiál sensitivu eleisaun hanesan buletin votu, akta, lista votante inklui dokumentu seluk ne’ebé relevante iha eleisaun antes ne’e.
“Bazeia ba despaixu Tribunál Rekursu maka ohin ita halo destruisaun ba materiál ne’ebé uza ba Eleisaun Prezidensiál tinan kotuk. Ami asegura iha armazen STAE munisípiu Viqueque atu ita fó espasu ba armazen, nune’e ita mós bele loke fila urna ne’ebé uza ba Eleisaun Parlamentár iha loron 21 maiu 2023. Agora armazen iha ona espasu nune’e apuramentu nasionál Eleisaun Parlamentár hotu bele asegura fali materiál eleisaun iha armazen laran,” Diretór STAE Viqueque, Humberto Fernandes, hateten hafoin ramata atividade destruisaun iha resintu Administrasaun Viqueque.
Notísia relevante : STAE Viqueque identifika folla buletin votu ida kona tinta
Tanba ne’e, STAE konvida Administradór munisípiu Viqueque no partidu polítika sira iha rejiaun hodi asiste distruisaun.
Iha fatin hanesan, Administradór munisípiu Viqueque, Januário Soares ‘Bolly’, hateten, tempu ona halo destruisaun materiál tanba iha ona Prezidente eleitu no laiha problema.
“Ohin ita ofisializa destruisaun ba materiál Eleisaun Prezidensiál tinan kotuk nian ho prezensa partidu polítiku sira ita hamutuk hodi sai testamuña ba destruisaun ida-ne’e,” nia dehan.
Jornalista : Vitorino Lopes da Costa
Editora : Julia Chatarina
