STAE Viqueque identifika folla buletin votu ida kona tinta

VIQUEQUE, 16 maiu 2023 (TATOLI)—Ekipa hosi Sekretariadu Tékniku Administrasaun Eleitorál (STAE) munisípiu Viqueque identifika folla buletin votu ida kona tinta durante prosesu empakotamentu materiál Eleisaun Parlamentár.

Diretór STAE Viqueque, Humberto Fernandes, relata, prosesu empakotamentu hahú domingu (14/05) no akompaña hosi observadór no partidu polítiku sira ne’ebé sai sasin.

“Ami hetan folla buletin tahan ida noda hosi print, iha tinta kona mean oitoan. Nune’e ami mós anota ona distribuisaun folla noda ne’e monu iha sentru votasaun ne’ebé no ami sei ko’alia ho fiskál sira hodi tau sira-nia observadór katak folla noda ne’e la uza,” Diretór hateten iha salaun Administrasaun munisípiu Viqueque, tersa ne’e.

Notísia relevante : STAE Viqueque identifika sentru votasaun 18 la asesu eletrisidade

Durante loron-tolu nia laran halo empakotamentu tékniku sira loke ona kaixa sia, nune’e falta tan balun.

“Ohin ami kontinua loke kaixa tolu ne’e, espera katak ohin ami bele finaliza buletin votu hirak ne’e. Tanba tuir kalendáriu ami sei termina empakotamentu iha loron 19 maiu no fó tempu semana ida atu halo verifikasaun ba materiál sensitivu no naun sensitivu,” nia akresenta.

Tuir observasaun jornalista Agência Tatoli iha terrenu, nota katak tékniku STAE kontinua halo empakotamentu, ne’ebé prosesu ne’e akompaña hosi Komisaun Nasionál Eleisaun (CNE, sigla portugés), observadór nasionál, inklui akompaña hosi fiskál partidu polítiku sira.

Bazeia ba dadus, totál folla 65.450 iha livru hamutuk 3.309 ne’ebé tau iha kaixa hamutuk 12.

Munisípiu Viqueque estabelese sentru votasaun hamutuk 112 no estasaun votu 135. Enkuantu, dadus eleitór munisípiu Viqueque ba tinan 2023 hamutuk 58.566.

Jornalista     : Vitorino Lopes da Costa

Editora          : Julia Chatarina