VIQUEUE, 20 maiu 2023 (TATOLI)—Komandu Polísia Nasionál Timor-Leste (PNTL) munisípiu Viqueque, sábadu ne’e, destaka ona membru sira ba sentru votasaun hodi fó seguransa ba Eleisaun Parlamentár iha loron 21 maiu 2023.
“Iha dadeer ida-ne’e, ita destaka ona membru ba fatin votasaun hotu iha munisípiu Viqueque. Ho nune’e, ha’u husu ba membru sira atu kontrola ita-boot sira-nia an no kontrola ema sira-ne’ebé besik sentru votasaun labele hemu tua, asuntu ida-ne’e importante tebes. Ha’u hatene katak membru Polísia balun hatene hemu tua, maibé hosi ohin to’o bain-rua ita sei limite konsumu alkool iha fatin votasaun sira,” Komandante PNTL Viqueque, Supertendente Sebastião Alves Quintão, hateten iha serimónia destakamentu membru iha Kuartel PNTL, Beskem, Viqueque Vila.
Notísia relevante : PR Horta apela eleitór hotu ba vota iha eleisaun parlamentár
Supertendente Sebastião Alves orienta ona membru sira atu tau-atensaun ba regra sira no fó atensaun ba negosiante sira ne’ebé fa’an tua besik iha sentru votasaun.
“Ha’u husu ba membru sira ne’ebé destaka iha fatin votasaun, orsida kalan tenke atensaun másimu atu labele hamosu perturbasaun ruma hodi afeta ba sentru votasaun,” nia akresenta.
Nia fó hanoin, karik iha buat balun mosu iha sentru votasaun, membru sira tenke iha korrajen foti desizaun.
“Tanba ida-ne’e maka responsablidade nu’udar autoridade seguransa durante 24 oras. Hosi inísiu deslokasaun munisípiu Viqueque bá seguransa sentru votasaun, akompaña votasaun, kontajen votu, akompaña apuramentu munisipál no ramata ita sei akompaña ba apuramentu nasionál. Ita sei kolabora ho FALINTIL-Forsa Defeza Timor-Leste (F-FDTL) hodi akampaña to’o formasaun Governu foun”, nia informa.
Iha sorin seluk, Komandante Polísia sente orgullu ho prezensa F-FDTL durante ne’e hodi apoia Polísia halo seguransa ba festa demokrasia, tanba ne’e presiza mantein relasaun no kolaborasaun.
Tuir dadus membru ne’ebé destaka ba sentru votasaun 112 no estasaun votasaun hamutuk 134 iha Viqueque hamutuk na’in-172, kompostu hosi membru PNTL Viqueque, Unidade Espesiál, Batallaun Orden Públiku inklui F-FDTL.
Jornalista : Vitorino Lopes da Costa
Editora : Julia Chatarina
