STAE Covalima hahú distribui materiál eleisaun ba sentru votasaun
COVALIMA, 20 maiu 2023 (TATOLI)–Sekretáriu Tékniku Administrasaun Eleitorál (STAE) Covalima, hahú distribui materiál sensitivu no la’ós sensitivu ba sentru votasaun no estasaun votasaun iha munisípiu Covalima.
Notísia Relevante: STAE Covalima aluga karreta 15 transporta materiál eleisaun ba sentru votasaun
“Ohin, ita hala’o lansamentu distribuisaun materiál sensitivu no la’ós sensitivu ba sentru votasaun hotu ne’ebé estabelese iha munisípiu Covalima ne’ebé durante ne’e STAE hala’o preparasaun hahú iha loron 12 fulan-maiu ne’ebé simu materiál sensitivu hosi nasionál to’o hala’o distribuisaun,” Diretór STAE Covalima, Francisco Gusmão, hateten liuhosi nia diskursu, iha resintu AMC, sábadu ne’e.
Durante ne’e, STAE munisípiu Covalima hala’o preparasaun no hala’o verifikasaun materiál sensitivu no la’ós sensitivu ba eleisaun parlamentár, hetan supervizaun hosi Komisaun Nasionál Eleisaun (CNE-sigla portugés) no fiskál partidu polítiku sira no hetan observasaun hosi observadór Renetil no Caucus.
“Ohin, ita bele hala’o serimónia lansamentu distribui materiál sensitivu no la’ós sensitivu ba sentru votasaun no estasaun votasaun iha munisípiu Covalima,” nia dehan.
Iha serimónia distribuisaun ne’e, diretór STAE mós husu ba brigada sira atu hala’o servisu iha sentru votasaun no estasaun votasaun ho di’ak, hodi kaer lema STAE nian nune’e brigada sira bele servisu ho imparsiál, transparánsia, neutral no tenke asegura materiál eleisaun.
Diretór CNE Covalima, Hermenegildo de Sena, hateten ohin komemora loron restaurasaun independénsia Timor-Leste ba dala-21 no hala’o serimónia lansamentu distribuisaun materiál eleisaun sensitivu no la’ós sensitive.
Ho nune’e, CNE sei hala’o supervisaun másima iha sentru votasaun no estasaun votasaun ne’ebé mak eziste iha Covalima bainhira akontese buat ruma iha Ofisiál CNE no autoridade seguransa hodi halo koordenasaun, nune’e labele fó impaktu ba prosesu eleisaun.
Tuir dadus ba eleisaun parlamentar tinan ne’e, Sekretáriu Tékniku Administrasaun Eleitorál (STAE) Covalima estabelese sentru votasaun 100 no estasaun votasaun 120 iha munisípiu Covalima.
Jornalista : Celestina Teles
Editór : Cancio Ximenes
