STAE Covalima aluga karreta 15 transporta materiál eleisaun ba sentru votasaun
COVALIMA, 18 maiu 2023 (TATOLI)—Sekretáriu Tékniku Administrasaun Eleitorál (STAE) Covalima sei aluga karreta 15 atu transporta ka distribui materiál sensitivu no la’ós sensitivu ba sentru votasaun no estasaun votasaun ne’ebé estabelese iha Covalima.
Notísia Relevante: STAE Covalima finaliza ona pakotementu materiál eleisaun
“Ita Covalima hetan apoiu viatura hoi nasionál hamutuk karreta sia (9), nune’e sai dezáfiu ba STAE Covalima atu halo distribuisaun materiál eleisaun. Nune’e, ita aluga karreta 15 bazeia simu orientaun hosi nasionál,” Diretór STAE Covalima, Francisco Gusmão, hateten ba Agência Tatoli iha nia servisu fatin, Kampung Baru, kinta ne’e.
Bazeia ba planu STAE Covalima, nia dehan, karreta operasionál ne’ebé atu transporta materiál eleisaun ba sentru votasaun sira hamutuk 50, no hosi númeru ne’e karreta ida (1) tula materiál hosi sentru votasaun rua.
“Ita-nia planu operasionál ne’ebé ita enkamiña ba STAE nasionál, viatura atu transporta materiál eleisaun hamutuk 50 ne’ebé karreta ida hatun materiál hosi sentru votasaun rua, ho sentru votasaun iha 100 fahe fali ba karreta 50,” nia dehan.
Kareta 50 ne’e, nia hateten, STAE identifika viatura estadu 22 iha munisípiu Covalima maibé karreta hirak ne’e balun kondisaun ladún di’ak, nune’e menus karreta atu transporta material eleisaun maibé tanba husu nasionál apoiu de’it kaereta sia (9).
Entertantu, Eleisaun Parlamentár 2023 ne’e Sekretátiu Tékniku Administrasaun Eleitorál estabelese sentru votasaun 100 no estasaun votasaun 120.
Antes ne’e, iha 13 fevreiru 2023, Prezidente Repúblika José Manuel Ramos Horta dekreta ona loron eleisaun parlamentár hala’o iha loron 21 fulan-maiu tinan 2023.
Notísia Relevante: STAE Covalima rejista eleitór elizivél 49.436
Jornalista : Celestina Teles
Editór : Cancio Ximenes
