STAE Covalima finaliza ona pakotementu materiál eleisaun
COVALIMA, 17 maiu 2023 (TATOLI)—Sekretáriu Tékniku Administrasaun Eleitorál (STAE) munisípiu Covalima, kuarta ne’e, finaliza ona halo pakotementu materiál sensitivu no la’ós sensitivu prepara ba eleisaun parlamentár 21 maiu 2023.
Notísia Relevante: STAE Covalima rejista eleitór elizivél 49.436
“Ohin, finaliza ona halo pakotementu, ita kontinua segel urna materiál sensitivu no la’ós sensitivu hodi prepara atu halo distribuisaun materiál ba sentru votasaun sira,” Diretór STAE Covalima, Francisco Gusmão, hateten ba jornalista sira iha nia servisu fatin, Kampung Baru.
Durante iha prosesu halo verifikasaun, nia dehan, brigada STAE sira identifika buletin votu balun fo’er, tanba tinta mak kona no balun númeru seriál liu, nune’e deside bulletin hirak ne’e sei la uza ba vota.
Aleinde ne’e, diretór STAE kontinua informa katak livru buletin votu ida mak la uza tanba afeitadu hosi insidente ne’ebé akontese iha 12 maiu 2023 ne’ebé karreta transporta material eleisaun hosi Dili ba Covalima tanba travaun la-han hodi soke fali karreta seluk iha Dare, Mulo, Ainaro.
Hafoin finaliza halo pakotementu materiál sensitivu ho la’ós sensitive, brigada Sekretáriu Tékniku Administrasaun Eleitorál ho Ofisiál sira hosi asegura materiál eleisaun ne’ebé xave ona iha urna laran hodi prepara halo distribuisaun ba sentru votasuan no estasaun votasaun ne’ebé estabelese iha munisípiu Covalima.
Entertantu, STAE Covalima sei Transporta materiál sensitivu ho la’ós sensitivu hosi nasionál mai iha munisípiu Covalima iha loron 12 fulan-maiu tinan 2023.
Tuir dadus, STAE Covalima simu livru buletin votu hosi STAE nasionál iha sesta (12/05/2023) hamutuk 1,102 ho totál folla rihun 55,100.
Notísia Relevante: STAE deside la uza livru buletin votu hetan estragu iha Dare
Jornalista : Celestina Teles
Editór : Cancio Ximenes
